Qaraǵandy oblysynda oqýshylar sany 5 myńǵa artty

1220

Qaraǵandy oblysynda 209 myń oqýshy úshin jańa oqý jyly dástúrli formatta bastalmaq. Ótken jylmen salystyrǵanda olardyń sany 5000-ǵa artyp otyr. Birinshi qyrkúıekte  20 800 birinshi synyp oqýshysy alǵash ret partaǵa otyrady, dep habarlaıdy "Adyrna" ulttyq portalynyń tilshisi.

Oblys ákiminiń orynbasary Abzal Núkenovtiń tóraǵalyǵymen kámeletke tolmaǵandardyń isteri jáne olardyń quqyqtaryn qorǵaý jónindegi turaqty jumys isteıtin oblystyq komıssııa otyrysynda jańa oqý jylyna daıyndyq máseleleri talqylandy. Kezdesý onlaın rejımde ótti.

Búgingi kúni Qaraǵandy oblysynda  489 qalalyq jáne aýyldyq mektep jumys isteıdi. Komıssııa otyrysynda shaǵyn jınaqty mektepterdiń jumys isteýine qatysty birqatar máseleler kóterildi.  Mektepteri 5-10 baladan aspaıtyn aýdandar bar ekendigi, keıbir aýyldyq mektepterde balalardyń jetispeýshiligi baıqaldy. Osyǵan sáıkes, bilim berý sapasy týraly másele týyndap,  birqatar obektıvti sebepterge baılanysty keıbir mektepter qaıta quryldy. Basty negiz - QR Bilim jáne ǵylym mınıstrligi belgilegen balalar sany boıynsha normatıvterge sáıkes kelmeý.

Mektepter jabylǵan árbir eldi meken boıynsha balalardyń oqýyn qaıda jalǵastyratyny týraly másele sheshildi. Olardy jaqyn mańdaǵy basqa aýylǵa aparyp jáne qaıtadan úıge alyp baratyn bolady, bir bóligin ınternattarǵa ornalastyrady, dep habarlady bilim basqarmasynyń basshysy Gúlsim Qojahmetova.

Abzal Núkenov tasymaldaýda eshqandaı problemalar bolmaýy kerek ekenin basa aıtty. Ol balalardyń sapaly bilim alýy kerektigin, shaǵyn jınaqty mektepterde kadr tapshylyǵy máselesi týyndaǵanyn atap ótti.

Bul májbúrli shara boldy. Biz balalardyń bolashaǵy týraly oılanýymyz kerek, olar erteń bilimdi bolyp shyǵyp,  JOO men kolledjderge túsip, mamandyq alýy tıis. Barlyq máselelerdi balalardyń múddelerin eskere otyryp sheshý kerek jáne olardyń quqyqtarynyń qorǵalýyn qamtamasyz etý qajet -dep málimdedi oblys ákiminiń orynbasary.

Komıssııa sondaı-aq erekshe bilim berýdi qajet etetin balalardy psıhologııalyq- pedagogıkalyq, áleýmettik jáne medıınalyq ońaltý máselelerin qarady. Abzal Núkenov barlyq baǵyttar boıynsha tapsyrmalar berdi. Ákimniń orynbasary balalar qaýipsizdigin qamtamasyz etýge basa nazar aýdardy.

"Adyrna" ulttyq portaly

Pikirler
Uqsas jańalyqtar