Qaýipsizdik maqsatynda BUU-nyń 100-ge jýyq qyzmetkeri Kabýldan Almatyǵa qashyqtan jumys isteýge aýystyrylady. Eger jaǵdaı turaqtalsa, olar Aýǵanstanǵa oralady. Bul týraly 18 tamyz, sársenbide BUU Bas hatshysynyń resmı ókili Stefan Dıýjarrık brıfıngte aıtty, - dep habarlaıdy “Adyrna” ulttyq portaly Tengrinews.kz saıtyna silteme jasap.
"Birikken Ulttar Uıymy qyzmetkerleriniń bir toby búgin Kabýldan Qazaqstanǵa, Almatyǵa ketip jatyr. Olar jumysyn qashyqtan jalǵastyrady", - dep habarlady Dıýjarrıktiń sózin RIA Novostı.
Onyń aıtýynsha, Aýǵanstandaǵy BUU-nyń 100-ge jýyq qyzmetkeri Almatyda jumys isteıdi dep josparlanǵan, olar jaǵdaı turaqtalǵan kezde oralady.
Bul arada Qazaqstannyń Syrtqy ister mınıstrligi málimetinshe, Aýǵanstandaǵy ishki saıası ahýaldyń ýshyǵýyna baılanysty BUU Qazaqstannan Aýǵanstanǵa kómek kórsetý mıssııasyn (UNAMA) jáne Almatydaǵy BUU-nyń basqa da agenttikterin ýaqytsha kóshirýdi suraǵan.
"Qazaqstan men BUU-nyń jan-jaqty ózara is-qımyly rýhy sheńberinde jáne osy uıymnyń tolyq quqyqty múshesi retindegi mindettemeleri aıasynda Prezıdent Qasym-Jomart Toqaev BUU ótinishin qoldaý týraly sheshim qabyldady", - delingen habarlamada.
18 tamyzda UNAMA qyzmetkerleri bar alǵashqy bort Almaty áýejaıyna qondy. SIM Almaty Ákimdigi, quzyretti vedomstvolar jáne qyzmettermen birlesip, olardy ornalastyrý boıynsha jedel túrde qajetti sharalardy qabyldap jatyr. Kelgen qyzmetkerler halyqaralyq dıplomat, BUU pasporty men ımmýnıteti ıegeri.
Almatyda UNAMA jáne basqa da BUU agenttikteriniń keńselerin ornalastyrý jáne olardyń odan ári qyzmet etýi ýaqytsha, ıaǵnı Aýǵanstandaǵy jaǵdaı turaqtalǵanǵa deıin, shamamen jarty jylǵa sozylady dep kútiledi.
Qyzmetkerlerdiń turýy, keńse men úı-jaılaryn jalǵa alýy jáne t.b. barlyq shyǵysty tolyǵymen BUU-nyń bıýdjetinen qarjylandyrylady.
