Oblys ákimi Ońdasyn Orazalın Tokıoda ótken jazǵy Olımpıada oıyndarynan oralǵan aqtóbelik sportshylarmen jáne olardyń jattyqtyrýshylarymen kezdesti dep habarlaıdy "Adyrna" ulttyq portaly.
Olımpıadanyń qola júldegeri Nurıslam Sanaevqa óńir basshysy páter kiltin syılady. Olımpıada oıyndaryna qatysqan balýan Meırambek Aınaǵulovqa, sýda júzýshi Dıana Nazarovaǵa, sonymen qatar, sportshylardyń jattyqtyrýshylaryna óńir basshysy baǵaly syılyqtar tabystady.
— Sizder - elimizdiń maqtanyshysyzdar. Jas urpaqqa salaýatty ómir salty men sportty dáripteýde úlgi bola otyra baǵa jetpes úles qosasyzdar. Adal ári aıanbaı kúreskenderińiz úshin, batyldyqtaryńyz ben otansúıgishtikterińizge shyn júrekten alǵys aıtamyn,- dedi sportshylarǵa zor densaýlyq pen jańa belesterge jetýdi tilegen Ońdasyn Orazalın.
Olımpıadaǵa qatysýshylar oblys basshylyǵyna kásibı sportty qoldaǵany úshin rahmet aıtyp, keleshek josparlarymen bólisti.
— Halqyma qoldaǵany úshin sheksiz rızamyn. Aqtóbege kelgennen keıin ǵana, jerlesterimniń qalaı qarsy alǵandaryn kórip, olımpıada júldegeri bolǵanymdy sezindim. Otandastarymdy Parıjde ótetin olımpıadada altyn alqamen qýantý úshin budan da kúshtirek daıyndalatyn bolamyn,- dedi Nurıslam Sanaev.
Aıta keteıik, balýan Iýsýp Batyrmyrzaev pen karateshi Nurqanat Ájiqanov, sonymen qatar Tokıodaǵy olımpıada oıyndarynda Aqtóbe oblysy atynan shyqqan basqa da sportshylar týǵan jerge endi oralady.
Sonymen birge júzýshi Vıtalıı Hýdıakov Ystyq kól janynda ótip jatqan oqý-jattyǵý jıynyna kirisip te ketken.
"Adyrna" ulttyq portaly .
