Özbekstandaǧy «Millii tiklaniş» demokratiialyq partiiasynyŋ jetekşısı Älışer Qadyrov reseilık telejürgızuşı Vladimir Solovevtıŋ Reseidıŋ «yqpal aimaǧy» turaly aitqan pıkırın synǧa aldy, dep habarlaidy "Adyrna" ūlttyq portaly UzDaily.uz-ǧa sıltep.
Qadyrovtyŋ aituynşa, öŋırde yqtimal äskeri äreketter turaly arandatuşylyq mälımdemelerge sabyrmen qarau qajet. Ol Özbekstannyŋ syrtqy saiasattaǧy basty ūstanymy – halyqaralyq qūqyqqa negızdelgen pragmatikalyq ärı özara tiımdı saiasat jürgızu, barlyq dostas memlekettermen yntymaqtastyqty damytu ekenın atap öttı.
«Reseilık būqaralyq aqparat qūraldarynda üzdıksız aitylyp jatqan mūndai mälımdemeler strategiialyq serıktestık pen odaqtastyq qatynastardyŋ ruhyna qaişy kelıp qana qoimai, olardy älsıretuı mümkın», – dedı Älışer Qadyrov.
Onyŋ sözınşe, Ortalyq Aziia – qauıpsızdık, tūraqtylyq jäne tatu körşılık aimaǧy. Būl – qarqyndy damu men özara yntymaqtastyqqa arnalǧan keŋıstık, al bauyrlas memleketter kez kelgen agressiiaǧa bırlesıp jauap beruge qabılettı.
Aita keteiık, Solovevtıŋ mälımdemesınen keiın Qyrǧyzstan deputaty da pıkır bıldırgen.
