Youtube áleýmettik jelisindegi «Til Maydani onlaın» platformasynyń jetekshisi Qýat Ahmetovtyń jumysy durys-aq. Qazaq tiliniń mártebesin kóterýge baǵyttalǵan ıgi bastama. Ózge ult ókilderi qazaq tilin bilýi kerek, qurmetteýi tıis. Biraq tek radıkaldy jolmen emes. Biz ózimiz óz tilimizdi syılamasaq, qurmettemesek, ózgelerden qalaı sony kútemiz?
Qazaq bilimimen, mádenıetimen, ónerimen, ónertapqyshtyǵymen ózgelerdi moıyndatýy kerek. Mysaly, Dımash Qudaıbergen álemniń mıllıondaǵan jurtyn qazaq tilinde án salǵyzdy. Biz órkenıetti jolmen ózimizdi ózgertsek, ózgeler de sonda bizge qarap boı túzeıdi, tipti bizge elikteıtin bolady.
Qazaqctan endi álem moıyndaǵan ónerpaz, ánshiler ǵana emes, Ilon Mask tárizdi ónertapqysh, kásipkerler shyǵýy kerek. Ózimiz soǵan kúsh salýymyz kerek. Qazaq tili tehnıkanyń, bıznestiń, qarjynyń, bilim men ǵylymnyń tiline aınalýy tıis.
Qýat Ahmetovtyń belsendi jumystaryna Reseı baspasózi de nazar aýdarypty.
Erteń Reseı bıligi tarapynan da elimiz ben jerimizdiń tutastyǵyna qaýip tónbesine kim kepil? "Taıaqtyń eki ushy bar". Artyq qylamyn dep tyrtyq qylyp almaıyq. Ásire siltep barymyzdan aırylyp qalyp júrmeıik, aǵaıyn.
"Adyrna" ulttyq portaly
