Bıohakerlerdi bir oı biriktiredi. Olar ǵylymnyń kómegimen aǵzanyń múmkindikterin arttyryp, ómirlerin uzartqysy keledi. Bir qyzyǵy árqaısysynyń óz metodologııasy men tájirıbesi bar. Munan bólek bıohakerlerdiń ómir súrý stıli men birneshe laıfhaktary bar. Olaı bolsa, birsypyrasyn nazarlaryńyzǵa usynaıyq.
Durys tamaqtaný
Kóptegen bıohakerler eń aldymen durys tamaqtanýǵa keńes beredi. “Aýrý - astan” demekshi, tutynǵan taǵamyńyzǵa mán berseńiz, kóptegen aýrý-syrqaýdyń aldyn alǵan bolar edińiz. Olardyń basym bóligi maıly taǵamdar men gazdalǵan sýsyndardy jemis-jıdek pen salat japyraqtaryna almastyrǵan.
Dárýmen qabyldaý
Búginde dári-dármektiń de, dárýmenniń de túr-túri bar. Ony izdep alysqa sabylýdyń da qajeti shamaly. Tóńirektegi dárihanaǵa barsańyz, dárýmenniń neshe túrin tabasyz. Osylaısha, aǵzadaǵy jetkiliksiz dep tapqan dárýmenniń ornyn op-ońaı toltyrýǵa bolady.
Salaýatty ómir saltyn ustaný
Salaýatty ómir saltyn ustaný tek durys tamaqtanýmen shektelmeıdi. Sondaı-aq, sport, uıqy men alkogol, gazdy sýsyndardan bas tartý da teride aıtarlyqtaı bilinetinin baıqaǵan shyǵarsyz.
Kúlki, kúlki jáne kúlki
Kúlki - ómirdi uzartatady desem, Amerıka ashqanym emes. Rasynda, kúlkiniń mańyzy asa zor. Kúndelikti ǵajap sátterge shyn júrekten qýana bilý - ómirdi uzartady. Ári únemi túnerip júretinderge qaraǵanda jadyrap-jaınap júretinder óz jasynan áldeqaıda jas kórinetinin baıqadyńyz ba?!
Medıtaııa
Óz-ózińmen tynyshtyqta qalyp, ishki daýysyńdy tyńdaı alý mańyzdy. Aınaladaǵy artyq shý adamnyń mıyna keri áserin tıgizerin umytpaıyq. Al medıtaııa jan tynyshtyǵyn qalpyna keltirip, óz ishki daýsyńdy tyńdaýǵa septigin tıgizedi. Qulaqqap kıip alyp, 10 mınýt boıy tapjylmaı otyr demesek te, 10-20 mınýt tynyshtyqta jaıaý serýendegenińiz artyq etpes.
Jattyǵý
Sizdiń zalda ári-beri júgirýge, ziltemir kóterip, aerobıkamen aınalysýǵa ýaqytyń joq pa? Endeshe jaı ǵana jattyǵý jasańyz. Ol úshin saǵattap dene qımylyn jasaýdyń qajeti shamaly. Bar bolǵany azdaǵan ýaqytyńyzdy bólip, turaqty túrde dene qımylyn jasap tursańyz jetkilikti.
Bıohakerler túrli ǵylymnyń kómegimen ómirdi barynsha sapaly etip, uzartýǵa bolatynyna senimdi. Negizgi maqsattary - sanaly oı qalyptastyrý arqyly ómir stılin barynsha jaqsy jaǵyna qaraı ózgertý. Bul bıohakerlerdiń laıfstaıly. Sizge de ómir saltyńyzdy durystap, densaýlyǵyńyzǵa kóńil bólýge kesh emes. Bul sizdiń qolyńyzdan keledi.
Nazerke Ásetova
