Aqtóbe oblysynda bes aıda 13 myńǵa jýyq jańa jumys orny quryldy. Bul týraly oblys ákimi Ońdasyn Orazalın Ortalyq kommýnıkaııalar qyzmetinde ótken Aqtóbe oblysynyń bıylǵy bes aıdaǵy áleýmettik-ekonomıkalyq damýynyń qorytyndylary men aldaǵy kezeńge arnalǵan josparlary týraly baspasóz máslıhaty barysynda málimdedi.
«Memleket basshysy óziniń Qazaqstan halqyna Joldaýynda atap ótkendeı, halyqtyń jumyspen qamtylýy jáne olardyń tabystaryn saqtaý bizdiń basty mindetterimizdiń biri bolyp tabylady. Búgingi kúni oblysta jumyssyzdyq deńgeıi 4,8% quraıdy, bes aıda 13 myńǵa jýyq jańa jumys orny qurylsa, onyń jartysy turaqty. Jastar arasyndaǵy jumyssyzdyq deńgeıi de ortasha respýblıkalyq deńgeıden tómen - 2,5%. Jalpy, bıylǵy jyly 53 myń jumyssyz ben ózin-ózi jumyspen qamtyǵandardy jumysqa ornalastyrýǵa kómek kórsetý josparlanyp otyr», - dedi O.Orazalın.
Esepti kezeńde oblysta ortasha aılyq eńbekaqy 196 myń teńgeni qurady, bul ótken jyldyń sáıkes kezeńimen salystyrǵanda 16,5% -ǵa artyq.
«Buǵan, sonyń ishinde, jyl basynan beri qyryqtan astam iri jáne orta kásiporyndardyń 30 myńnan asa jumysshynyń eńbekaqysyn ortasha 15% -ǵa ósirýiniń arqasynda qol jetti», - dedi oblys ákimi.
Sondaı-aq, memlekettiń áleýmettik saıasatyn iske asyrý aıasynda jyl basynan beri 24 myńǵa jýyq azamat 710 mıllıon teńge kóleminde ataýly áleýmettik kómek aldy, 1 jastan 6 jasqa deıingi 5,7 myń balaǵa jalpy somasy 161 mln. teńgege kepildendirilgen áleýmettik paket berildi. Jergilikti deńgeıde qosymsha qoldaý kórsetý maqsatynda 13 myńǵa jýyq azamatqa túrli jeńildikter, qosymsha tólemder men 702 mln.teńge kóleminde ótemaqylar berildi.
Sonymen qatar, bıyl 14,5 myń múmkindigi shekteýli jandardy áleýmettik qoldaýǵa 3,1 mlrd. teńge bólindi.
