Bıyl Aqtóbe oblysynda 14 aýyl gazdandyrlady. Bul týraly Ortalyq kommýnıkaııalar qyzmetinde ótken baspasóz máslıhatynda Aqtóbe oblysynyń ákimi Ońdasyn Orazalın málimdedi.
«Aýyz sýmen jáne gazben qamtamasyz etý – memleket basshysy únemi aıtyp otyratyn basym mindetterdiń biri. Búginde oblys ortalyqtandyrylǵan sýmen qamtý jaǵynan Qazaqstan boıynsha óńirler arasynda úzdik bestiktiń qatarynda. Kórsetkish 96,2%-dy quraıdy. Bıyl quny 8,4 mlrd. teńge bolatyn 28 jobany júzege asyrý josparlanyp otyr. Bul jyldyń qorytyndysy boıynsha oblys halqynyń 97,3%-n ortalyqtandyrylǵan sýmen qamtamasyz etýge múmkindik beredi. 2025 jylǵa qaraı biz halyqty aýyz sýmen 100% qamtamasyz etý mindetin qoıyp otyrmyz», - dedi O.Orazalın.
Qazirgi kezde oblys turǵyndarynyń 91,6%-y gazben qamtamasyz etilgen. Bıyl gazben jabdyqtaý jobalaryn iske asyrýǵa 5,9 mlrd. teńge qarastyrylǵan. Nátıjesinde 14 aýyldyń turǵyndary úshin kógildir otyn qol jetimdi bolady, bul turǵyndardyń gazben qamtylýyn 92,6% -ǵa deıin arttyrady.
