Ońtústik Koreıanyń Chedjý aralynda 16 kıiz úıden turatyn aýyl paıda boldy dep habarlaıdy "Adyrna" ulttyq portaly "Habar 24-ke" silteme jasap.
Aralda zamanaýı úıler de bar. Biraq olardyń kóbi bos turǵanǵa uqsaıdy. Sebebi týrısterdiń kópshiligi kóshpendi eldiń ómirimen tanysqysy kelip, kıiz úılerdi tańdaıtyn kórinedi.
"Munda kıiz úıler tuńǵysh ret tigildi. Kóptegen týrıster olardy birinshi ret kórip otyr. Mońǵolııa men Qazaqstanda osyndaı úıler bar ekenin tek saıahatqa arnalǵan telebaǵdarlamalardan estip bilgen. Sondyqtan týrıster tarapynan zor qyzyǵýshylyq bar. Bizdiń keshen kórkem jerde ornalasqan, barlyq jaǵdaı jasalǵan. Sol úshin halyqtyń arasynda tanymal dep oılaımyz", - deıdi basqarýshy kompanııanyń bólim basshysy Kım Son Gı.
Kıiz úıde turý baǵasy táýligine shamamen 500 dollardy quraıdy. Óńirde bir bólmeni bes ese arzan jalǵa alýǵa bolatyndyǵyn eskersek, bul qymbat. Al basqarýshy kompanııa bolsa, baǵany ádil dep sanaıdy, óıtkeni kıiz úıde birden tórt adamǵa turýǵa bolady. Bul somaǵa kelýshiler mıneraldy sýmen toltyrylǵan basseındi jáne kvadroıkldi paıdalana alady eken.
"Osyndaı kıiz úılerdi jobalaý kezinde biz kóptegen materıaldardy zerttedik. Dızaındy amerıkalyq kompanııa jasady. Kóptegen qonaqtar bul dástúrli mońǵol turǵyn úıi dep oılaıdy. Al biz olarǵa bul Ortalyq Azııanyń kıiz úıleri dep jaýap beremiz. Men ózim Qazaqstanda bolǵan emespin. Biraq men qazaqtardyń bizge óte uqsas ekenin bilemin. Onda koreılerdiń úsh urpaǵy turady. Geografııalyq jaǵynan óte alys bolǵanymen, tilimiz ben syrtqy kelbetimiz uqsas. Ertede biz bir halyq bolǵan shyǵarmyz", - deıdi basqarýshy kompanııanyń aǵa menedjeri Kım Dje Sın.
Qazir kıiz úıdi tabys kózine aınaldyryp otyrǵan kompanııa endi as mázirine qazaqtyń ulttyq taǵamdaryn qosýdy oılap otyr. Sonymen qatar, qazan aıynan bastap bul aýylǵa kelýshiler atqa minip, ekzotıkalyq taǵamdardan dám tata alady.
"Adyrna" ulttyq portaly.
