وڭتۇستىك كورەيانىڭ چەدجۋ ارالىندا 16 كيىز ۇيدەن تۇراتىن اۋىل پايدا بولدى دەپ حابارلايدى "ادىرنا" ۇلتتىق پورتالى "حابار 24-كە" سىلتەمە جاساپ.
ارالدا زاماناۋي ۇيلەر دە بار. بىراق ولاردىڭ كوبى بوس تۇرعانعا ۇقسايدى. سەبەبى تۋريستەردىڭ كوپشىلىگى كوشپەندى ەلدىڭ ومىرىمەن تانىسقىسى كەلىپ، كيىز ۇيلەردى تاڭدايتىن كورىنەدى.
"مۇندا كيىز ۇيلەر تۇڭعىش رەت تىگىلدى. كوپتەگەن تۋريستەر ولاردى ءبىرىنشى رەت كورىپ وتىر. موڭعوليا مەن قازاقستاندا وسىنداي ۇيلەر بار ەكەنىن تەك ساياحاتقا ارنالعان تەلەباعدارلامالاردان ەستىپ بىلگەن. سوندىقتان تۋريستەر تاراپىنان زور قىزىعۋشىلىق بار. ءبىزدىڭ كەشەن كوركەم جەردە ورنالاسقان، بارلىق جاعداي جاسالعان. سول ءۇشىن حالىقتىڭ اراسىندا تانىمال دەپ ويلايمىز", - دەيدى باسقارۋشى كومپانيانىڭ ءبولىم باسشىسى كيم سون گي.
كيىز ۇيدە تۇرۋ باعاسى تاۋلىگىنە شامامەن 500 دوللاردى قۇرايدى. وڭىردە ءبىر بولمەنى بەس ەسە ارزان جالعا الۋعا بولاتىندىعىن ەسكەرسەك، بۇل قىمبات. ال باسقارۋشى كومپانيا بولسا، باعانى ءادىل دەپ سانايدى، ويتكەنى كيىز ۇيدە بىردەن ءتورت ادامعا تۇرۋعا بولادى. بۇل سوماعا كەلۋشىلەر مينەرالدى سۋمەن تولتىرىلعان باسسەيندى جانە كۆادروتسيكلدى پايدالانا الادى ەكەن.
"وسىنداي كيىز ۇيلەردى جوبالاۋ كەزىندە ءبىز كوپتەگەن ماتەريالداردى زەرتتەدىك. ديزايندى امەريكالىق كومپانيا جاسادى. كوپتەگەن قوناقتار بۇل ءداستۇرلى موڭعول تۇرعىن ءۇيى دەپ ويلايدى. ال ءبىز ولارعا بۇل ورتالىق ازيانىڭ كيىز ۇيلەرى دەپ جاۋاپ بەرەمىز. مەن ءوزىم قازاقستاندا بولعان ەمەسپىن. بىراق مەن قازاقتاردىڭ بىزگە وتە ۇقساس ەكەنىن بىلەمىن. وندا كورەيلەردىڭ ءۇش ۇرپاعى تۇرادى. گەوگرافيالىق جاعىنان وتە الىس بولعانىمەن، ءتىلىمىز بەن سىرتقى كەلبەتىمىز ۇقساس. ەرتەدە ءبىز ءبىر حالىق بولعان شىعارمىز", - دەيدى باسقارۋشى كومپانيانىڭ اعا مەنەدجەرى كيم دجە سين.
قازىر كيىز ءۇيدى تابىس كوزىنە اينالدىرىپ وتىرعان كومپانيا ەندى اس مازىرىنە قازاقتىڭ ۇلتتىق تاعامدارىن قوسۋدى ويلاپ وتىر. سونىمەن قاتار، قازان ايىنان باستاپ بۇل اۋىلعا كەلۋشىلەر اتقا ءمىنىپ، ەكزوتيكالىق تاعامداردان ءدام تاتا الادى.
"ادىرنا" ۇلتتىق پورتالى.
