Ortalyq Azııa elderiniń ishinde Qytaımen ekonomıkalyq baılanysyn qarqyndy túrde arttyryp jatqan Tájikstannyń búginde kelbeti úlken ózgeriske ushyraýda. Taýly aımaqtaǵy altyn ken oryndarynyń teń jartysy Beıjińge kelisim boıynsha berilgen.
«Zarafshon», «Taror», «Djılaý», «Hırshona» men «Olımpııskoe», «Pakrýt» ken oryndary Qytaıdyń qolyna ótken. Tájikstanda Zijin Mining Group Co. Ltd, China Nonferrous Gold Limited pen TVEA atty úsh kompanııa altyn kenishterin burǵylaýmen, paıdaly qazbany Qytaıǵa jiberýmen aınalysyp jatqanyna birneshe jyldyń júzi boldy.
Sonymen qatar, Qytaı tarapy ózge de kenishterdi ıemdenip, túrli qurylys jumystaryn júrgizip jatyr. Bunyń barlyǵy Tájikstanda qytaılardyń kóbeıýine áser etip, qalalar men aýdandarda Qytaı meıramhanalary, emhanalar men saýda oryndary, tipti tutastaı bazarlar salynýda.
Tájikstanda qansha qytaı ultynyń bary belgisiz. 2018 jyly 5486 qytaı azamatyna resmı qyzmet etýge ruqsat berilgen derekti memlekettik BAQ ókilderi taratqanymen, beıresmı qytaılyqtardyń sany 130-140 myń adamdy quraıdy deıdi demograftar. Ony kúndelikti kúıbeń tirlik barysynan aq ańǵarý qıyn emes sııaqty.
Tájik astanasy Dýshanbede arnaıy qytaı azamattaryna arnalǵan emhana ashylǵan. Onyń birden bir sebebi jergilikti emhana qyzmetkerleri qytaı tilin bilmeıdi, sáıkesinshe aýyrǵan qytaılyqtardy emdeı almaıdy. Búginde Tájikstanda qytaı jazýlarymen atalatyn mekemeler óte kóp.
"Adyrna" ulttyq portaly
