Bügın qazaq muzyka önerınıŋ körnektı ökılı, änşı-kompozitor, Qazaq KSR-ınıŋ halyq ärtısı ataǧynyŋ iegerı Däneş Raqyşevtıŋ tuǧanyna 100 jyl toldy. Ol 1926 jyldyŋ 1 mamyrynda Almaty oblysy, Raiymbek audany, Taldy auylynda düniege kelgen.
Däneş Raqyşevtıŋ öner joly erte bastalyp, ūlttyq muzykaǧa degen erekşe yqylasymen erekşelendı. Ol qazaqtyŋ dästürlı än önerın jaŋa deŋgeige köterıp, özıne tän oryndauşylyq mäner qalyptastyrdy. 33 jasynda, 1959 jyly tuǧan jerıne oralǧan sätten bastap, onyŋ şyǧarmaşylyǧy keŋınen tanyla bastady. Būryn sirek oryndalǧan, bıraq qazaqy äuezı men tereŋ maqamy bar änderdı ol erekşe sezımmen oryndai bıldı. «Baianauyl», «Jan erke», «Aiaulym», «Jiyrma jetı qyz», «Jan säulem», «Säulem-ai», «Qoş-aman bol, jarym» siiaqty halyq änderı onyŋ oryndauynda keŋınen tanylyp, qazaq än önerınıŋ kökjiegın keŋeittı.
Öner iesı tek änşı ǧana emes, akter retınde de tanyldy. Ol Qūljadaǧy ūiǧyr-qazaq drama teatrynda jūmys ıstei jürıp, Beiımbet Mailinnıŋ «Şūǧa» pesasyndaǧy Äbdırahman, sondai-aq Mūhtar Äuezovtyŋ «Eŋlık-Kebek» spektaklındegı Japal men Qalqaman rölderın somdaǧan.
1959 jyly Qazaqstanǧa oralǧannan keiın Däneş Raqyşev Taldyqorǧan halyq teatryna basşylyq jasady. 1968 jyldan bastap Taldyqorǧan oblystyq filarmoniiasynyŋ solisı retınde qyzmet ettı. Onyŋ repertuary öte bai bolyp, qazaq, ūiǧyr, qyrǧyz, özbek, tatar halyqtarynyŋ änderın qamtydy. Ol Manarbek Erjanov pen Jüsıpbek Elebekov siiaqty önerpazdardyŋ oryndauşylyq dästürın jalǧastyryp, käsıbi deŋgeide damytty.
Repertuarynda Ükılı Ybyraidyŋ «Aŋşynyŋ änı», Äsettıŋ «Ardaq», «Maqpal», «Atym Äset», «Hysmet», «Aha-au, jalǧan», «Jaiqoŋyr» siiaqty halyq änderı erekşe oryn aldy. Sonymen qatar, ol qazırgı qazaq kompozitorlarynyŋ şyǧarmalaryn da keŋınen oryndady.
Özı de bırneşe än şyǧarǧan talant iesı boldy. Onyŋ «Şattyq tolqyny», «Maqtanyşty elım bar», «Jas qairat», «Jer sūluy Jetısu», «Komsomol», «Saiasynda almanyŋ», «Jeŋeşe», «Tuǧan jer», «Almatym» siiaqty änderı halyq arasynda keŋ taralyp, el jüregınen oryn aldy.
Däneş Raqyşev – qazaq än önerınde özındık qoltaŋbasyn qaldyrǧan, dästürlı jäne käsıbi muzykany ūştastyra bılgen ırı tūlǧa. Onyŋ şyǧarmaşylyǧy ūlttyq mädeniettıŋ damuyna ülken üles qosyp, qazaq än önerınıŋ altyn qoryna ainaldy.
