Bala künınde aşarşylyqtyŋ azabyn öz közımen körgen, ǧalym, abaitanuşy — Mekemtas Myrzahmetūly kezektı sūhbattarynyŋ bırınde qasıretke toly estelıkterınen syr şerttı, dep habarlaidy "Adyrna" ūlttyq portaly.
"Men aşarşylyqty öz közımmen kördım. 3-4 jasar kezım. Şeşem menı köterıp bara jatty. Aĭnalamda ölıp jatqan adamdar. Bazardan bır närseler alyp, qaĭtyp kele jattyq. Közım qarny jarylyp jatqan adamǧa tüsıp edı, şeşem közımdı kölegeĭlep jaba berdı. Sonda adamnyŋ ışı keuıp, jarylyp ketedı eken. Mūnyŋ bärı sanaly türde qoldan jasalǧan genosid ekenın keĭın bıldım», - deĭdı ǧalym. Ol 1932-1933 jyldardaǧy aşarşylyq turaly aĭtty. «Şeşem, qaryndasym üşeumız jolǧa şyqtyq. Keş bolyp qalǧan kezde bızdı üş qasqyr qorşap aldy. Men qoryqqanymnan anamnyŋ etegınıŋ ışıne kırıp kettım. Qasqyrlardyŋ közderı jarqyrap tūrdy. Bır kezde taiaǧyna süĭengen şeşem menı arqalap, qaşa jöneldı. Qasqyrlar jym bolyp qaldy. Odan keĭın qaryndasymnyŋ şyŋǧyrǧan dauysyn estıdım. Qasqyrlar talasyp, ony jep jatty. Bız saĭǧa tüsıp ketıp, aman qaldyq. Osyndaĭ jaǧdaĭ qazaq dalasynyŋ är jerınde bolyp jatty... Sol kezde «Stalin mūny bılse – qoĭdyrar edı» degen sözder aĭtyluşy edı. Negızınde kerısınşe eken ǧoĭ... Onyŋ maqsaty ūly dalany iesız qaldyru edı. Özımızdı özımız qolǧa almasaq, basqa eşkım janaşyr bolmaĭdy. Jastar tarihty jaqsy bılıp, şyndyqty aşuy kerek. Bız sol aşarşylyq kezınen bastap ūlttyq sanadan aĭyryldyq. İnstitut bıtırgennen keĭın ǧana menıŋ sanam aşyla bastady. «Qazaq qalaĭ orystandyryldy?» degen kıtapty jazyp, qazaqtyŋ oĭ sanasyna äser ete alǧandaĭ boldyq", - deĭdı Mekemtas Myrzahmetov.
"Adyrna" ūlttyq portaly
Ūqsas jaŋalyqtar
