Aımaǵambetov neden qorqatynyn aıtty: Qashyqtan oqytý taǵy sozyla ma?

4427
Adyrna.kz Telegram

Qashyqtan oqytý taǵy bir jylǵa sozylsa, ony kótere almaı qalýymyz múmkin. Óıtkeni onlaın format bárin sharshatqan. Bilim jáne ǵylym mınıstri Ashat Aımaǵambetov pedagogıkalyq keńeste osyndaı qorqynyshyn aıtty, dep habarlaıdy «Adyrna» ulttyq portaly KTK arnasyna silteme jasap.

«Bizge koronavırýsqa qarsy vakınany alyp, túrli biliktilikti arttyrý kýrstarynan ótip, jazǵy mektepti joǵary deńgeıde ótkizip, eńbek demalysy kezinde jaqsylap demalyp alý kerek. Munyń bári kelesi oqý jylyn bastaýǵa negiz bolady dep esepteımin. Men aldaǵy bilim berý jylynda dástúrli formatqa oralamyz degen oıdamyn. Óıtkeni bári sharshady. Kelesi oqý jyly qashyqtan oqý formatynda bolsa, oqý proesiniń tıimdiligine óte qatty áser etedi», - deıdi QR Bilim jáne ǵylym mınıstri Ashat Aımaǵambetov.

Qazaqstanda koronavırýsqa qarsy ekpe saldyrý erikti ekenin atap ótken sheneýnik áriptesteriniń durys sheshim qabyldaıtynyna senimdi. Mınıstr vakınany oılap tapqandardyń ishinde otandyq ǵalymdardyń úlesi bar ekenin alǵa tartty. Al el ishinde ujymdyq ımmýnıtet qalyptassa, elimizdiń bas muǵalimi qashyqtan oqytýdan qutylyp, barlyq balanyń 1-qyrkúıekte mektepke oralýyn qalaıdy.  Áıtpese onlaınnyń kesiri oqýshylardyń bilim sapasyna keri áserin tıgizgen sekildi. Bir jaǵynan, úıden shyqpaı balalardy oqytý bıýdjetke de aýyr soqqy. Biraq Aımaǵambetov búgingi jıynda qarjy máselesi týraly sóz qozǵamady.

"Adyrna" ulttyq portaly

Pikirler