Qaryzdan qutylý úshin búıregimdi satamyn. Qyzylorda qalasynyń turǵyny, kópbalaly ana amalsyzdan osyǵan barýǵa májbúrmin deıdi. Kredıt keńirdekten, ósim pul alqymnan aldy dep jylaıdy, dep habarlaıdy «Astana» telearnasy.
31 jastaǵy kelinshektiń alty balasy bar. Jumyssyz. Joldasynyń tabysy iship-jemnen artylmaıdy. Sondyqtan áıel shıetteı bala-shaǵanyń kem-ketigin túgendeımin dep júrip qaryzǵa belsheden batqan.Ony qaıtara almaıdy. Bereshegin surap kúnde bireý keledi. Bar tapqan amaly – búıregin satyp, qaryzdan qutylý.
«Sebebi jańaǵy kisiler úıge kúnde kelip mazalaıdy. Tipti kishkentaı bir jasar qyzymdy da «bizge ber, otkaz jazyp ber» dep aıtty. Iá, «balany maǵan ber, aqyry tóleı almaısyń» deıdi. Kim balasyn qıyp beredi? Aıtyńyzshy, qandaı jaǵdaı bolmasyn, eshkim balasyn qımaıdy ǵoı. Sonymen qatty nalydym», - deıdi Qyzylorda qalasynyń turǵyny.
Kelinshektiń aıtýynsha, aǵzaǵa qara naryqta suranys bar. Kúnde habarlasyp, búırekti saýdalaıtyndar kóp.
«Jeti mılıon teńge dep aıttym. Maǵan bir kisi habarlasyp, balasynyń búırekke zárý ekenin aıtyp, tegin berýin surady. Men ony tegin beretindeı óleıin dep jatqan joqpyn ǵoı. Tegin berip ketemin deıtindeı. Ózim amalsyz, muqtaj bolyp turmyn, renjimeńiz dedim. Aqysyna ǵana beremin dedim. Odan keıin de birneshe adam habarlasty», - deıdi turǵyn.
Ranker.com saıtynyń málimeti boıynsha, qara bazarda búırektiń baǵasy AQSh-ta 200 myń dollar turady. Al Qytaı men Úndistanda budan sál arzan. Barlyq elde de búırekke suranys joǵary.
Nur-Sultandaǵy transplanttaý ortalyǵynyń málimetinshe, búırek jetispeýshiligimen esepte turǵandar sany úsh myńnan asady. Ókpe, baýyr, júrekke de suranys joq emes.
Ortalyqta aǵzany aýystyrý tegin júrgiziledi. Ol úshin donorlarǵa aqsha tólenbeıdi. Tek zańdy jolmen, tıisti talaptarmen ǵana qabyldanady. Al óz erkimen dene múshesin saýdalaǵandar jazaǵa tartylady.
«Adamnyń aǵza músheleri men tinin alýǵa májbúrleý nemese zańsyz alý faktileri Qazaqstan Respýblıkasy Qylmystyq kodeksiniń 116-baby boıynsha tergeledi. Dál osy qylmystar abaısyzda jábirlenýshiniń ólimine nemese ózge de aýyr zardaptarǵa ákep soqqan jaǵdaıda nemese muny qylmystyq top jasaǵan bolsa, segiz jyldan on eki jylǵa deıingi merzimge bas bostandyǵynan aıyrýǵa jazalanady», - dedi QR Ishki ister mınıstriniń keńesshisi Nurdildá Oraz.
Psıholog mamandardyń pikirinshe, qarjylyq qıyndyqtar týyndaǵan kezde adamnyń minez-qulqy ózgeredi. Bul ony túrli áreketke ıtermeleýi múmkin deıdi.
«Eń aldymen, sharasyzdyqtan baratyn shyǵar. Ekinshiden, menińshe, adam ózin-ózi qunsyzdandyryp, «Ómirde qundy dúnıe joq» dep oılaýy múmkin. Qazir qundylyqtar qatty tómendep ketti ǵoı. Bul da bir sonyń kórinisi dep aıtýǵa bolady», - deıdi psıholog Lımana Qoıshıeva.
Qansha jerden joqshylyq jaǵadan alyp, ósimpul aıaqtan tartsa da, zańsyz áreketke jol joq. Jaza aýyr. Biraq ony eshkim eskermeıtin sekildi. Bas prokýratýranyń Quqyqtyq statıstıka jáne arnaıy esepke alý jónindegi komıtetiniń málimetinshe, adam aǵzalaryn saýdalaý boıynsha ótken jyly elimizde 57 qylmystyq is tirkelgen.
