Qyzylorda oblysy, Şielı audany, Jidelıaryq auylynda bır jarym jyl ışınde bırde-bır qylmys faktısı tırkelmegen, dep habarlaidy «Adyrna» tılşısı. Būl turaly Polisia.kz baǧdarlamasynyŋ kezektı şyǧarylymynda aityldy.
Qazırgı taŋda auylda 518 otbasy tūrady. Jergılıktı tūrǧyndardyŋ aituynşa, auylda 2019 jyldan bastap bügınge deiın bırde-bır qylmys jasalmaǧan. Būǧan azamattardyŋ tatu-tättı qatynasta boluy jäne uchaskelık polisiia inspektorynyŋ qolǧa alǧan profilaktikalyq şaralary negız boldy. Atap ötu kerek, atalmyş auylda ekı düken bar, alaida, eşqaisysynda alkogol satylmaidy.
Toqtarbai Dulatov – osy aimaqtyŋ tumasy. Uchaskelık inspektor bolǧandyqtan, ol bırınşı kezekte auyl tūrǧyndarymen jäne aqsaqaldarmen, kent äkımşılıgımen, jergılıktı mektep oquşylarymen jäne olardyŋ ata-analarymen özara bailanys ornatqan. Uchaskelık inspektor auyl äkımşılıgımen bırge mal jaiudy ūiymdastyrdy. Endı januarlar ünemı baqylauda. Sonymen qatar, Toqtar kömekşılerımen bırge atpen nemese kölıkpen kenttı jäne onyŋ ainalasyn ünemı patruldeidı.
– Toqtar osy auylǧa kelgelı qylmys azaiyp, auylymyzda qazır mal ūrlyǧy joq dep aituǧa bolady. Uchaskelık inspektor mektep qyzmetkerlerımen tyǧyz bailanysta. Oquşylarmen, ata-analarmen reidter ūiymdastyryp tūrady, – dedı auyl äkımı Erlan Äbıldaşev.Jidelıaryqta “Saqşy-Sarbaz” qoǧamdyq bırlestıgı jūmys ısteidı. Kün saiyn ekı auyl tūrǧyny uchaskelık inspektorǧa tärtıptı qadaǧalauǧa kömektesedı. Jalpy, Qyzylorda oblysy boiynşa mal ūrlyǧy faktılerı 20%-ǧa azaiǧan. Būǧan qūqyq qorǧau organdarynyŋ arnaiy äzırlegen aldyn-alu şaralary jäne osy qylmys üşın jazany küşeitu yqpal ettı. Endı mal ūrlyǧy üşın barlyq mülıkten aiyrylyp, ıstıŋ män-jaiyna bailanysty 5 jyldan 12 jylǧa deiın bas bostandyǧynan aiyru jazasy qarastyrylǧan.
– Saqşy-sarbazdarmen bırıgıp, tünde de, kündız de qylmystyŋ aldyn-alu profilaktikalyq jūmystaryn jürgızemız. Osy jūmystardyŋ nätijesın elep, Qyzylorda oblysynyŋ Polisiia departamentınıŋ bastyǧy NIVA jaŋa avtokölıgın berdı, – dep atap öttı uchaskelık inspektor Toqtarbai Dulatov.
«Adyrna» ūlttyq portaly
Ūqsas jaŋalyqtar
