Búgingi ótken Úkimet otyrysynda kóktemgi dala jumystaryn ótkizý barysy pysyqtaldy.
Bul baǵytta Shymkent qalasynda bıyl 29,3 myń gektar jerge egin egý josparlanýda. Bul ótken jylmen salystyrǵanda 1,4 myń gektarǵa artyq (2020 jyly – 27,9 myń gektar). Onyń ishinde dándi daqyldar (bıdaı, arpa, júgeri) – 12,9 ga, maıly daqyldar (maqsary, kúnbaǵys) - 3,8 ga, kókónis pen baqsha – 3 ga, kartop - 0,7 ga, mal azyqtyq daqyldar - 8,9 ga aýmaqqa egiledi dep kózdelýde.
Nátıjesinde jınalatyn ónim kólemi 71,7 myń tonnaǵa jetip, ótken jylmen salystyrǵanda 12,4 myń tonnaǵa artady (2020 jyly – 59,3 myń tonna).
Kóktemgi dala jumystaryn júrgizýge 1 myń tonna janar - jaǵarmaı bólinip, operator anyqtalyp qoıǵan. Bul qaladaǵy iri 60 aýyl sharýashylyǵy taýaryn óndirýshilerdiń egin egý jumystaryn júrgizýge tolyǵymen jetedi. Agroqurylymdarǵa jetkizip berýdi qosa alǵandaǵy jetkizý quny lıtrine 157 teńge bolyp bekitildi (naryqtaǵy baǵasy 183-185 teńge).
Kóktemgi dala jumystaryna traktor, tuqym sepkishter, jer qopsytqyshtar, topyraq óńdeıtin agregattar sekildi tehnıkanyń sany jetkilikti. Búginde olar 93,2 paıyzǵa daıyn.
Sonymen qatar, shaharda osy jylǵa mıneraldy tyńaıtqyshtardyń qunyn sýbsıdııalaýǵa 122 mln. 146 myń teńge, tuqym sharýashylyǵyn damytýdy sýbsıdııalaýǵa 5 mln. 885 myń teńge, pestııdterdiń, bıoagentterdiń qunyn sýbsıdııalaýǵa 600 myń teńge bólindi.
Shymkent qalasy ákimdiginiń baspasóz qyzmeti
