Shymkenttiń qalasyndaǵy kóshege Qazaq radıosynyń ataýy berildi

1359
Adyrna.kz Telegram

18 naýryz – «Igi ister kúni» aıasynda Shymkent qalasynda QR Úkimetiniń janyndaǵy Respýblıkalyq onomastıka komıssııasynyń qorytyndysy negizinde ataýy joq 325 kóshege ataý berildi.

Osyǵan oraı, Shymkent qalasy «Bozaryq» shaǵynaýdanyndaǵy kóshege ultymyzdyń únjarııasy, 100 jyldyq tarıhy bar Qazaq radıosynyń ataýy berilip, saltanatty ashylý rásimi ótti. Sharaǵa Nur-Sultan, Almaty qalalarynan kelgen qurmetti qonaqtar men jergilikti zııaly qaýym ókilderi, turǵyndar qatysty.

Jıynda sóz alǵan Shymkent qalasy ákiminiń birinshi orynbasary Shyńǵys Muqan jańa kóshelerge ataý berý barysynda ulttyq qundylyqtarymyzǵa basymdyq berilip otyrǵanyn atap ótti.

– 14-24 naýryz aralyǵynda «Naýryz Shymkentte bastalady» degen izgi bastamamen qalamyzda úlken is-sharalar ótip jatyr. Kúni keshe «Qarataý» dástúrli óner mektebi ashyldy. Bolashaqta sol mekteptiń túlekteriniń daýsyn Qazaq radıosynan estımiz dep oılaımyz. Naýryz toıynyń aıasynda Shymkenttegi 325 kóshege ataý berildi. Shymkent qalasynyń ákimi Murat Áıtenovtiń usynysymen, qalalyq máslıhattyń hatshysy Bahadyr Narymbetovtiń uıytqy bolýymen kúni búgingi máslıhat otyrysynda Qazaq radosy kóshesi resmı bekitildi. Shahar osy jaqqa qaraı qulashyn jaıyp keledi. Shymkenttiń damyp kele jatqan turǵyn alabynda ashylǵan kóshemiz qutty bolsyn! Bolashaqta Qazaq radıosy kóshesi Qazaq radıosy dańǵylyna aınalyp jatsa tańǵalmaǵaısyzdar! – dedi Shyńǵys Jumabekuly.

Jarty ǵasyrdan astam ǵumyryn Qazaq radıosynda ótkizgen ardager-dıktor, Qazaq radıosynyń sandýǵashy Saýyq Jaqanova da Shymkenttegi Qazaq radıosy kóshesiniń ashylýyna arnaıy kelipti.

– Ózińniń shyqqan bosaǵań, týǵan balańdaı bop ketken radıońdy qurmettep jatsa qalaı qýanbaısyń?! Qazaqty bútkil dúnıe júzine tanytqan, qazaqtyń áni, sazy men kúıin kórsetken Qazaq radıosyn respýblıkada birinshi bolyp ardaqtap jatqan sizderge myń da bir Alǵys! Bul sizderdiń eńbekterińizge qaraı ataqty dańǵyl bolatynyna senemin, - dedi S. Jaqanova.

Qazaq radıosynyń ataýy berilgen kóshe 2,5 shaqyrymǵa sozylyp jatyr. Osy mereıli kúnge oraı, búgin keshke saǵat 18:00-de Shymkent qalasyndaǵy Qazaqstan halqy assambleıasy ǵımaratynda Qazaq radıosynyń 100 jyldyǵyna arnalǵan arnaıy konerttik is-shara ótedi.

Sondaı-aq, atalǵan aýdandaǵy taǵy birneshe kóshege respýblıkalyq buqaralyq aqparat quraldarynyń ataýy berildi. Olardyń qatarynda elimiz úshin joǵary mańyzdylyqqa ıe basylym ataýlary men radıo, ádebı shyǵarmalar ataýlary bar. Máselen Qarataý aýdany Bozaryq saıajaıyndaǵy ataýy joq kóshelerge ǵasyrdan astam ómir súrip kele jatqan respýblıkalyq «Egemen Qazaqstan» gazetiniń qurmetine qoıylǵan Egemen Qazaqstan, sonymen birge Ana tili, Qazaq radıosy, Jas alash, Abaı joly, Qalqaman – Mamyr, Aq bilek, Qamar sulý sekildi kóshe attary paıda boldy. Odan ózge qalamyzdyń tarıhyn aıshyqtaıtyn, tabıǵı erekshelikteri men ólke ózgesheligin eskerip, taý-tas, saı-sala, ózen-kólge laıyqty ataýlar da berildi.

Aldaǵy ýaqytta qalaǵa qarasty aýdandardyń ákimderi osy birlesken qaýly men sheshimdi iske asyrý jóninde qajetti sharalar qabyldamaq. Al, qalalyq mádenıet, tilderdi damytý jáne arhıvter basqarmasy Qazaqstan Respýblıkasynyń zańnamasynda belgilengen tártippen osy qujatty Shymkent qalasynyń Ádilet departamentinde memlekettik tirkeýden ótkizedi. Birlesken qaýly men sheshim onyń alǵashqy resmı jarııalanǵan kúninen keıin kúntizbelik on kún ótken soń qoldanysqa engizilmek.

Shymkent qalasynyń Aqparattyq-kommýnıkaııalyq ortalyǵy

Pikirler