Jumabek Táshenovtyń qazaq úshin jasaǵan erligi men qaıratkerligin keń masshtabta dáriptemeý - bul bizdiń árýaqty umytqanymyz.
Ulylar umytylmaıdy!
Zamanynyń zańǵar uly, kúresker qaıratkeri!
Búgin Alty Alashtyń ardaqty uly, qazaqtyń mańdaıyna bitken kórnekti memleket jáne qoǵam qaıratkeri Jumabek Táshenovtyń týǵan kúni. Jumabek atamyz 1915 jyly 20 naýryzda Aqmola oblysy, Arshaly aýdany, Tanagúl aýylynda dúnıege kelgen.
Osy uly tulǵanyń qazaqtyń ulan-baıtaq jerin saqtap qalǵan erligi qazaq tarıhynda ǵasyrlarda qaıtalana bermeıtin qaısarlyq pen myqtylyq edi. Hrıýevpen tartysyp, alǵan betinen qaıtpaı, Qazaq eliniń tutastyǵy úshin basyn da, qyzmetin de báıgege tikke uly tulǵaǵa myń taǵzym! Kezinde Mańǵystaýdy Túrkimenstanǵa, Bostandyqty Ózbekstanǵa, Tyń ıgeriletin tutas aýmaqty Reseıge qosyp jibermek bolǵanda, qazaq jeri úshin jan arpalysqa túsken tulǵa osy Jumabek atamyz boldy. Ókinishke oraı Jumabek atamyzdyń aty men erligi laıyqty dáriptelmeı, jas býynǵa onyń erligi men qaıratkerligi jaıynda tolyq aıtylmaı keledi. Bul bizdiń qateligimiz, bulaı jasaý bizdiń paryzymyz edi! Táshenovtyń qazaq úshin jasaǵan erligi men qaıratkerligin keń masshtabta dáriptemeý - bizdiń árýaqty da umytqanymyz.
Bul adam tutas jany qazaq, qany qazaq azamattardyń barlyǵy úshin ıdeologııalyq tarıhı tulǵa bola alady. Qazaq tarıhynda eli úshin basyn báıgege tikken, rýhy men saǵy synbaı kúresken Jumabek atamyzdyń júrgen joly bizdiń jastarǵa kúreskerlik rýh pen jiger beredi.
Batyr men qaıratker almaǵaıyp, alasapyran kezde ǵana maıdanda kórinedi. Óz zamanynyń maıtalmany, óz zamanasynyń maıdanynda tóbe kórsetken uly tulǵaǵa myń taǵzym!
Bekbolat QARJAN,
"Adyrna" ulttyq portaly
