Reseıdiń eńbek naryǵynda jumysshylar jetpeı jatyr. Ótken jyly bul elge kelge kelgen sheteldikter sany ádettegiden eki jarym ese azaıǵan, dep habarlaıdy «Adyrna» tilshisi «Habar 24»-ke silteme jasap.
Máskeýde jumys istegen mıgranttardyń 40% elderine qaıtqan. Osynyń saldarynan buryn sheteldikter eńbek etken jumys oryndar sany kúrt artqan. Alaıda jergilikti turǵyndar oǵan qyzyqpaıdy eken.
Reseı ishki ister mınıstrliginiń málimetinshe, 2020 jyly aldaǵy jylmen salystyrǵanda tirkeýge turǵan mıgranttardyń sany eki ese azaıǵan. Shetel jumysshylarynyń sany jeti jarym mıllıonǵa deıin qysqardy. Máskeý oblysy mıgranttar kásipodaǵynyń basshysy
Abbos Ashýrovtyń aıtýynsha, 2019 jyly Reseıde resmı túrde Tájikstannyń 500 myńnan asa azamaty eńbek etken. Al byltyr budan 4 ese az bolǵan. Kásiporyndar jabyla bastaǵanda, kóbi eline qaıtty. Al endi shekaralar jabylyp, Reseıge qaıta kire almaı otyr.
«Aqpan aıynda Eýrazııalyq ekonomıkalyq odaqqa múshe Qyrǵyzstan, Armenııa, Qazaqstan elderiniń mıgranttaryna shekara ashý jóninde kelisim jasaldy. Al bul odaqqa kirmeıtin Tájikstan, Ózbekstan men ózge memleketterdiń azamattary kele almaı júr»,-dedi Máskeý oblysy mıgranttar kásipodaǵynyń basshysy Abbos Ashýrov.
Osyǵan baılanysty eńbek naryǵynda bos jumys oryndar sany kúrt artyp ketti. Mıgranttar negizinen qurylysta, qyzmet kórsetý salasy men kommýnaldyq sharýashylyqta jumys isteıdi. Máskeýde kýrerler men taksı júrgizýshilerge suranys 85%-ke, al qurylysshylarǵa 30%-ke artty. Al jumys berýshilerge mıgranttardy jaldaý tıimdi. Reseılikterden kóp eńbek etse de alatyn jalaqysy tómen. Sarapshylardyń esebinshe, Eńbek kodeksi boıynsha el azamattary aptasyna 40 saǵat jumys istese, shetel jumysshylary 60 saǵat eńbek etedi eken.
«Olardy saǵat tańǵy besten túngi on birge deıin jumys istetedi. Mıgranttarǵa qatysty jaǵdaı osylaısha ózgerdi. Reseı azamaty osyndaı jumysqa árıne turmaıdy. Eńbek qoly jetispeı júrgende elde qalǵan mıgranttardyń jumysy aıtarlyqtaı kóbeıdi. Biraq bul eńbegi úshin jalaqysyn almaýy da múmkin»,- dedi Eńbek mıgranttary kásipodaǵy ortalyq komıtetiniń basshysy Renat Karımov.
Ekonomısterdiń aıtýynsha, Reseı turǵyndary mundaı jumysqa qyzyqpaıdy. Al eńbek naryǵyndaǵy adam jetispeýshiligi máselesi pandemııa aıaqtalmaıynsha sheshilmeıtin túri bar.
«Adyrna» ulttyq portaly
