كۇندەلىكتى قارا جۇمىستى ىستەيتىن ادام تابىلماي جاتىر

4186
Adyrna.kz Telegram
Worker Hands.
Worker Hands.

رەسەيدىڭ ەڭبەك نارىعىندا جۇمىسشىلار جەتپەي جاتىر. وتكەن جىلى بۇل ەلگە كەلگە كەلگەن شەتەلدىكتەر سانى ادەتتەگىدەن ەكى جارىم ەسە ازايعان، دەپ حابارلايدى «ادىرنا» ءتىلشىسى «حابار 24»-كە سىلتەمە جاساپ.

ماسكەۋدە جۇمىس ىستەگەن ميگرانتتاردىڭ 40% ەلدەرىنە قايتقان. وسىنىڭ سالدارىنان بۇرىن شەتەلدىكتەر ەڭبەك ەتكەن جۇمىس ورىندار سانى كۇرت ارتقان. الايدا جەرگىلىكتى تۇرعىندار وعان قىزىقپايدى ەكەن.

رەسەي ىشكى ىستەر مينيسترلىگىنىڭ مالىمەتىنشە، 2020 جىلى الداعى جىلمەن سالىستىرعاندا تىركەۋگە تۇرعان ميگرانتتاردىڭ سانى ەكى ەسە ازايعان. شەتەل جۇمىسشىلارىنىڭ سانى جەتى جارىم ميلليونعا دەيىن قىسقاردى. ماسكەۋ وبلىسى ميگرانتتار كاسىپوداعىنىڭ باسشىسى

اببوس اشۋروۆتىڭ ايتۋىنشا، 2019 جىلى رەسەيدە رەسمي تۇردە تاجىكستاننىڭ 500 مىڭنان اسا ازاماتى ەڭبەك ەتكەن. ال بىلتىر بۇدان 4 ەسە از بولعان. كاسىپورىندار جابىلا باستاعاندا، كوبى ەلىنە قايتتى. ال ەندى شەكارالار جابىلىپ، رەسەيگە قايتا كىرە الماي وتىر.

«اقپان ايىندا ەۋرازيالىق ەكونوميكالىق وداققا مۇشە قىرعىزستان، ارمەنيا، قازاقستان ەلدەرىنىڭ ميگرانتتارىنا شەكارا اشۋ جونىندە كەلىسىم جاسالدى. ال بۇل وداققا كىرمەيتىن تاجىكستان، وزبەكستان مەن وزگە مەملەكەتتەردىڭ ازاماتتارى كەلە الماي ءجۇر»،-دەدى ماسكەۋ وبلىسى ميگرانتتار كاسىپوداعىنىڭ باسشىسى اببوس اشۋروۆ.

وسىعان بايلانىستى ەڭبەك نارىعىندا بوس جۇمىس ورىندار سانى كۇرت ارتىپ كەتتى. ميگرانتتار نەگىزىنەن قۇرىلىستا، قىزمەت كورسەتۋ سالاسى مەن كوممۋنالدىق شارۋاشىلىقتا جۇمىس ىستەيدى. ماسكەۋدە كۋرەرلەر مەن تاكسي جۇرگىزۋشىلەرگە سۇرانىس 85%-كە، ال قۇرىلىسشىلارعا 30%-كە ارتتى. ال جۇمىس بەرۋشىلەرگە ميگرانتتاردى جالداۋ ءتيىمدى. رەسەيلىكتەردەن كوپ ەڭبەك ەتسە دە الاتىن جالاقىسى تومەن. ساراپشىلاردىڭ ەسەبىنشە، ەڭبەك كودەكسى بويىنشا ەل ازاماتتارى اپتاسىنا 40 ساعات جۇمىس ىستەسە، شەتەل جۇمىسشىلارى 60 ساعات ەڭبەك ەتەدى ەكەن.

«ولاردى ساعات تاڭعى بەستەن تۇنگى ون بىرگە دەيىن جۇمىس ىستەتەدى. ميگرانتتارعا قاتىستى جاعداي وسىلايشا وزگەردى. رەسەي ازاماتى وسىنداي جۇمىسقا ارينە تۇرمايدى. ەڭبەك قولى جەتىسپەي جۇرگەندە ەلدە قالعان ميگرانتتاردىڭ جۇمىسى ايتارلىقتاي كوبەيدى. بىراق بۇل ەڭبەگى ءۇشىن جالاقىسىن الماۋى دا مۇمكىن»،- دەدى ەڭبەك ميگرانتتارى كاسىپوداعى ورتالىق كوميتەتىنىڭ باسشىسى رەنات كاريموۆ.

ەكونوميستەردىڭ ايتۋىنشا، رەسەي تۇرعىندارى مۇنداي جۇمىسقا قىزىقپايدى. ال ەڭبەك نارىعىنداعى ادام جەتىسپەۋشىلىگى ماسەلەسى پاندەميا اياقتالمايىنشا شەشىلمەيتىن ءتۇرى بار.

«ادىرنا» ۇلتتىق پورتالى

پىكىرلەر