Keshe VVS Shyńjańdaǵy lagerlerde musylman áıelderdi kúzetshilerdiń zorlaıtyny týraly kólemdi maqala jarııalaǵan bolatyn dep jazady "Adyrna" ulttyq portaly Facebook-taǵy jýrnalıst Oraz Álimbekovtiń jazbasyna silteme jasap.
Maqala negizinen Tursynaı Zııaýıdın esimdi 42 jastaǵy uıǵyr áıeldiń suhbatyna negizdelgen. Sózine qaraǵanda, kún saıyn túnge qaraı Tursynaıdy maska kıgen qytaı erkekter kamerasy joq qarańǵy bólmege aparyp zorlap júrgen.
Jýrnalıst sonymen qatar qazir Qazaqstanda turatyn Gúlzıra Áýelhan esimdi áıelmen suhbattasqan. Ol da birneshe aı lagerde bolǵan. «Meniń mindetim – zorlanatyn áıeldi sheshindirý, qolyn baılaý, erkekter ketken soń áıeldi jýyndyrý jáne bólmeni tazalaý boldy» degen Gúlzıra.
Tursynaı Zııaýıdın qazir AQSh-ta turady. Birneshe aı boıǵy zorlyq saldarynan aýrýǵa ushyraǵan ol AQSh-qa barǵan soń jatyryn aldyrýǵa májbúr bolǵan. «Ana bolý múmkindiginen osylaı aıyryldym» degen ol. Tursynaıdyń kúıeýi qazaq, ol qazir Qazaqstanda turady. Ol kúıeýimen AQSh-ta qosylǵysy keletinin aıtqan.
Ulybrıtanııa parlamentiniń depýtaty Nýs Ganı ókimetten atalǵan qylmystardy sot arqyly tolyq tekserýdi, oǵan deıin Qytaımen baılanysty tereńdetpeýge ýáde berýdi talap etti. Ulybrıtanııanyń Azııa isteri boıynsha memlekettik hatshysy Naıdjel Adams «VVS-diń reportajynda jarııalanǵan aıýandyqtar kez kelgen adamnyń janyn túrshiktiretini sózsiz» dedi. Ol Ulybrıtanııanyń Eýropa elderimen jáne AQSh-pen birlese otyryp Qytaıǵa qysym jasaıtynyn aıtty.
AQSh pen Ulybrıtanııa ókimetteri Qytaı lagerlerinde musylman áıelderdi zorlaý faktilerine qatysty málimdeme jarııalady. «Shyńjańdaǵy etnıkalyq uıǵyrlar men ózge de musylmandarǵa arnalǵan lagerlerde áıelderdiń júıeli túrde zorlyqqa jáne seksýaldyq qorlyqqa ushyrap jatqany týraly derekter, onyń ishinde oqıǵany óz kózimen kórgen adamdardyń kýálikteri bizdi qatty mazalap otyr. Bul jantúrshigerlik aıýandyq áreketter jaýapsyz qalmaýy tıis» delingen AQSh Memlekettik departamentiniń málimdemesinde.
