«Nur Otan» partııasynyń atynan jaqynda ǵana Májilis depýtaty bolyp saılanǵan Aıdos Sarym telejýrnalıst Nartaı Aralbaıulynyń ıýtýb arnasyna bergen suhbatynda áleýmettik jelige qatysty óz pikirin aıtty.
–Búgingi kúnde aqparattanýdyń birneshe quraly, BAQ, radıo, teledıdar, gazet, áleýmettik jeli bar. «Kez kelgen úlken saıasat jasaımyn» degen adam eshbir aqparat túrin joqqa shyǵara almaıdy. Men saılaý naýqany bastalar kezde bir-eki adamǵa qaratyp, feısbýk paraqshamda ádeıi jazǵam. «Búkil Nur Otan» partııasynyń músheleri áleýmettik jelige kiredi. Qazir ózderińdi tyńdap, ózderińdi maqtap júrsińder. Júz myńdap «Nur Otannyń» músheleri kirgen kezde ózderińniń pozıııalaryńyzdyń minsiz emes ekenine kózderiń jetedi. «Nur Otan» úgit -nasıhatyn aıtqan kezde kózderińiz alarady. Demala turyńyzdar» dep jazǵanmyn. Bul árıne ázil bolatyn. Biraq shyn máninde solaı. Demek, eshbir aqparat kózin ózińniń opponentine berip qoıýǵa bolmaıdy.
Eń ókinishtisi, áleýmettik jelide otyrǵan adamdardyń ózderi baıqamaı qalatyn zańdylyqtary bar. Birinshiden, algorıtm. Kez kelgen áleýmettik jeliniń algorıtmi onyń dúnıetanymy men aınalasyn shektep tastaıdy. Siz kimge ǵana laık basasyz, sony ǵana kórsetedi. Sizdiń feısbýkta 5 myńǵa taıaý dosyńyz bar delik. Biraq sonyń bárin de kórip otyrǵan joqsyz ǵoı. Ary ketse, 50-ýin ǵana kóresiz. Olardyń kóbisi - ózińizben pikirles, dıdarlas, dastarhandas azamattar. Sol 50 adam feısbýktegi búkil 5 myń dosyńyzdyń pikirin bere almaıdy.
Biraz ýaqyt Altynbek Sársenbaıulynyń janynda júrgen Aıdos Sarym ózin «satqyn» dep aıyptaǵandarǵa da ýáji baryn aıtty.
–Satqyndyq jasady» degendi men qabyldaı almaımyn. Shákirttiń de ósetini bolady, eshbir shákirt mektepte qalmaıdy. Satqyndyq degenge keler bolsaq, bir Májilistiń ózinde Altynbaı Sársenbaıulynyń qansha dosy, qansha shákirti otyr. Bári – bizdiń zamandastarymyz. Sonda bul áńgime nege tek maǵan ǵana aıtylýy kerek? Áńgimeniń adaldyǵy qaıda? – dedi ol.
Suhbat barysynda Nartaı Aralbaıulynyń «11 aqpan siz úshin qandaı kún?» degen saýalyna saıasattanýshy, depýtat «qaraly kún» dep jaýap berdi. Eskerte keteıik, 2006 jyldyń 11 aqpan kúni Altynbek Sársenbaıuly qylmyskerlerdiń qolynan saıası tapsyryspen qaza tapqany belgili.
–Dál qazir Altynbek Sársenbaıuly tiri bolsa, sizdiń bılik partııasy quramyna kirip, bılikke kelgenińizge ne aıtar edi? Taǵy da keshirim surar ma edińiz, –degen saýal5a Aıdos Sarym:
–Altekeń tiri bolsa, qazir kem degende bir partııanyń basshysy bolyp otyratyn edi. Eger siz 2006 jyly jazǵan úlken suhbattaryn qarasańyz, osy meniń búgingi aıtqan nárselerimniń bári aıtylǵan. Utyldyń ba, onda uzaq merzimdi jumysqa daıyn bolý kerek, – dep jaýap berdi «Nur Otan» partııasynyń atynan depýtat bolǵan Aıdos Sarym.
Erkin QALDAN, «Adyrna» aqparat portaly
