İranda tūratyn qazaq diasporasy jergılıktı qoǧamǧa tolyq integrasiialanǧan jäne Qazaqstanǧa köşu mäselesın kötergen joq. Būl turaly İrannyŋ Qazaqstandaǧy Tötenşe jäne Ökılettı Elşısı Äli Akbar Djoukar baspasöz mäslihatynda aitty, dep habarlaidy “Adyrna”.
Elşınıŋ aituynşa, İrandaǧy qazaq diasporasynyŋ ökılderı özderın iran qoǧamynyŋ bır bölıgı retınde sanaidy jäne el tarihyndaǧy kürdelı kezeŋderdı basqa azamattarmen bırge ötkergen.
“İranda tūratyn qazaq diasporasy iran qoǧamyna tolyq sıŋısıp ketken jäne özderın el azamattarynan bölek qarastyrmaidy. Tıptı qiyn kezeŋderde, şamamen 40 jyl būryn Saddam Husein rejimınıŋ agressiiasy kezınde de qazaq diasporasy irandyqtarmen bırge bolyp, öz elın qorǧady. Sondyqtan osy uaqytqa deiın irandyqtardyŋ, onyŋ ışınde qazaq diasporasynyŋ Qazaqstanǧa köşu turaly ötınış jasaǧan jaǧdailary bolǧan joq”, - dedı ol.
Äli Akbar azamattardyŋ ötınışterı negızınen tūrmystyq sipatta bolyp keletının jäne ekı el azamattarynyŋ özara qatynastaryna bailanysty mäselelerge qatysty ekenın aitty.
“Köbıne kündelıktı mäseleler boiynşa ǧana jügınu jaǧdailary bolady. Mysaly, Qazaqstan azamattary belgılı bır şaruamen İranǧa barǧysy keledı nemese İran azamattary Qazaqstanǧa keledı. Būl qalypty jaǧdai. Mūndaida Qazaqstan men İran taraptary qajettı kömek körsetedı”, - dep tüsındırdı ol.
