Basty qatyrmaı Ulttyq ǵylym akademııasyn qaıta ashý kerek te, búkil ǵylymı ınstıtýttardy soǵan berip, dırektoryn, ǵalymdardyń ózderi saılaıtyn etý qajet. Ótirik akademıkterdiń óz erkimen ketip qalýyna úsh kún berse jetedi.
Aýyl ákimin saılaý kerek dese "oıbaı, separatızm paıda bolýy múmkin" deıdi.
Oqýdyń túbine jetken ǵalymdarǵa óz ınstıtýtynyń dırektorlaryn saılaýǵa nege múmkindik berilmeıdi? Ony nege mınıstrlikte otyrǵan komıtet-sámıtettiń sheneýnikteri taǵaıyndaýy tıis? Sheneýnik aralasqan jer ońbaıdy.
Qazir memlekettiń ǵylymǵa bóletin aqshasy jalpy ishki ónimniń bir paıyzyna da jetpeıdi. Sony úsh paıyz qylsyn da Akademııaǵa, ǵalymdardyń ózine bersin. Ári qaraı bılik ǵylym sharýasyna aralaspasyn. Ǵylym bılikten táýelsiz bolǵanda ǵana damıdy. Akademııa prezıdenti tek Qazaqstan prezıdentine ǵana baǵynyshty bolsyn.
Qazir ne? Ǵylymı ınstıtýt basshylarynyń kúni topas sheneýnikterdiń qas-qabaǵyn ańdýmen ótedi. Álgi sheneýnikter ózi sııaqty bireýdi dırektor qylsa, ınstıtýtyń qurydy deı ber. Solaı sorlap qalǵan ınstıtýttar bar. Ol dırektordyń aq degeni alǵys, qara degeni qarǵys. Onymen qoımaı orta mektep oqýlyǵynyń bárine avtor bolyp, qyrýar aqsha alyp, balalarymyzdy saýatsyz qylyp jatqan dırektorlar da bar. Uıalsa qaıtedi?
Ǵylymmen aınalysady degen ǵalymdar ınstıtýtta azǵantaı aqshamen amaldap, joǵary oqý oryna zyr júgirip, nápaqa taýyp júr. Ǵylymı zertteýshi toq bolýy kerek. Ash ǵalym jaltaq bolady, dırektor, rektor ne aıtsa sony isteıdi. Ózi sııaqty jaltaq, jaǵympaz stýdentter ázirlep shyǵady. Joǵary oqý oryndarynyń rektorlary qudaı emes, qudaıdan bylaı da emes. Bular oqý oryndary emes, bar bolǵany rektorlardyń bıznesteri ǵana. Erikken rektorlar Afrıkaǵa baryp, arystan aýlaıtyn deńgeıge jetken.
Búkil joǵary oqý oryndaryn da mınıstrlikten qarjylandyrmaı, jekege jibere salý kerek, onsyz da árkimniń qaltasynda júrgen nárse, óz kúnderin ózderi kórsin, tarasa tarap ketsin. Bilim mınıstrligi orta mekteptermen ǵana aınalyssa jetedi. Anaý Ashat búgin birinshi synyptyń, erteń akademıktiń máselesimen shuǵyldanyp otyrady. Ashattyń basy altyn bolsa da onyń bárine birdeı jetpeıdi. Osy mınıstrlikke qaraıtyn Bilim birdeńesi, bilim sirdeńesi degen qaptaǵan parazıt mekemelerdi jedel jaýyp, bilim salasyn aqsha kózine aınaldyrǵan ótirik olımpıadalardy dereý toqtatyp, oqýlyqty úzdik muǵalimderge qarapaıym, túsinikti tilde jazdyrtý kerek, boldy.
