اسىلحان ماماشۇلى: ۇلتتىق عىلىم اكادەمياسىن قايتا اشۋ كەرەك

3248
Adyrna.kz Telegram

باستى قاتىرماي ۇلتتىق عىلىم اكادەمياسىن قايتا اشۋ كەرەك تە، بۇكىل عىلىمي ينستيتۋتتاردى سوعان بەرىپ، ديرەكتورىن، عالىمداردىڭ وزدەرى سايلايتىن ەتۋ قاجەت. وتىرىك اكادەميكتەردىڭ ءوز ەركىمەن كەتىپ قالۋىنا ءۇش كۇن بەرسە جەتەدى.

اۋىل اكىمىن سايلاۋ كەرەك دەسە "ويباي، سەپاراتيزم پايدا بولۋى مۇمكىن" دەيدى.
وقۋدىڭ تۇبىنە جەتكەن عالىمدارعا ءوز ينستيتۋتىنىڭ ديرەكتورلارىن سايلاۋعا نەگە مۇمكىندىك بەرىلمەيدى؟ ونى نەگە مينيسترلىكتە وتىرعان كوميتەت-ساميتەتتىڭ شەنەۋنىكتەرى تاعايىنداۋى ءتيىس؟ شەنەۋنىك ارالاسقان جەر وڭبايدى.

قازىر مەملەكەتتىڭ عىلىمعا بولەتىن اقشاسى جالپى ىشكى ءونىمنىڭ ءبىر پايىزىنا دا جەتپەيدى. سونى ءۇش پايىز قىلسىن دا اكادەمياعا، عالىمداردىڭ وزىنە بەرسىن. ءارى قاراي بيلىك عىلىم شارۋاسىنا ارالاسپاسىن. عىلىم بيلىكتەن تاۋەلسىز بولعاندا عانا داميدى. اكادەميا پرەزيدەنتى تەك قازاقستان پرەزيدەنتىنە عانا باعىنىشتى بولسىن.

قازىر نە؟ عىلىمي ينستيتۋت باسشىلارىنىڭ كۇنى توپاس شەنەۋنىكتەردىڭ قاس-قاباعىن اڭدۋمەن وتەدى. الگى شەنەۋنىكتەر ءوزى سياقتى بىرەۋدى ديرەكتور قىلسا، ينستيتۋتىڭ قۇرىدى دەي بەر. سولاي سورلاپ قالعان ينستيتۋتتار بار. ول ديرەكتوردىڭ اق دەگەنى العىس، قارا دەگەنى قارعىس. ونىمەن قويماي ورتا مەكتەپ وقۋلىعىنىڭ بارىنە اۆتور بولىپ، قىرۋار اقشا الىپ، بالالارىمىزدى ساۋاتسىز قىلىپ جاتقان ديرەكتورلار دا بار. ۇيالسا قايتەدى؟

عىلىممەن اينالىسادى دەگەن عالىمدار ينستيتۋتتا ازعانتاي اقشامەن امالداپ، جوعارى وقۋ ورىنا زىر جۇگىرىپ، ناپاقا تاۋىپ ءجۇر. عىلىمي زەرتتەۋشى توق بولۋى كەرەك. اش عالىم جالتاق بولادى، ديرەكتور، رەكتور نە ايتسا سونى ىستەيدى. ءوزى سياقتى جالتاق، جاعىمپاز ستۋدەنتتەر ازىرلەپ شىعادى. جوعارى وقۋ ورىندارىنىڭ رەكتورلارى قۇداي ەمەس، قۇدايدان بىلاي دا ەمەس. بۇلار وقۋ ورىندارى ەمەس، بار بولعانى رەكتورلاردىڭ بيزنەستەرى عانا. ەرىككەن رەكتورلار افريكاعا بارىپ، ارىستان اۋلايتىن دەڭگەيگە جەتكەن.

بۇكىل جوعارى وقۋ ورىندارىن دا مينيسترلىكتەن قارجىلاندىرماي، جەكەگە جىبەرە سالۋ كەرەك، ونسىز دا اركىمنىڭ قالتاسىندا جۇرگەن نارسە، ءوز كۇندەرىن وزدەرى كورسىن، تاراسا تاراپ كەتسىن. ءبىلىم مينيسترلىگى ورتا مەكتەپتەرمەن عانا اينالىسسا جەتەدى. اناۋ اسحات بۇگىن ءبىرىنشى سىنىپتىڭ، ەرتەڭ اكادەميكتىڭ ماسەلەسىمەن شۇعىلدانىپ وتىرادى. اسحاتتىڭ باسى التىن بولسا دا ونىڭ بارىنە بىردەي جەتپەيدى. وسى مينيسترلىككە قارايتىن ءبىلىم بىردەڭەسى، ءبىلىم سىردەڭەسى دەگەن قاپتاعان پارازيت مەكەمەلەردى جەدەل جاۋىپ، ءبىلىم سالاسىن اقشا كوزىنە اينالدىرعان وتىرىك وليمپيادالاردى دەرەۋ توقتاتىپ، وقۋلىقتى ۇزدىك مۇعالىمدەرگە قاراپايىم، تۇسىنىكتى تىلدە جازدىرتۋ كەرەك، بولدى.

پىكىرلەر