– Shymkenttegi atshabardy qoǵam qaıratkeri Asanbaı Asqarov 1979 jyly úlken kúreskerlikpen salyp berdi. Al oǵan deıin bul jer qurylysqa qajet tas pen qum óndiretin karer bolatyn. Sol karerdiń ústine sıyr fermasy salynǵan. Keıinnen bul jer ıppodromǵa aınaldyryldy.
Odan beri 41 jyl ótti. Ábden eskirdi.
Ulttyq sportqa janashyr kórermen báıgeni kórýge kelgende bir-biriniń kóleńkesine, panasyna tyǵylyp, ábirjip otyryp kóredi.
Jyl on eki aı ár mezgildiń qolaısyz aýa raıyna tótep berýine týra keledi. Sonda báriniń aıtatyny «Shatyr joq pa? Qashan salynady?» degen saýal.
Áý basta karerdiń ústine salynǵan atshabar bolǵandyqtan, qazirgi orny 8 metr tómende, jeldiń ótinen tómen jatyr. Al samal soqpaı, aýa almaspaı turǵan soń, attar qınalady. Erterekte ıppodromnyń aınalasy ashyq bolatyn.
Qazir «Naýryz» alańyndaǵy karýselden bastap, «Otau Group» qurylys kompanııasy salyp jatqan 4-5 turǵyn úı bar. Bul da atshabar aımaqqa samaldyń enýine kedergi bolǵany shúbásiz.
Buǵan deıin Ó.Shókeev Ońtústik Qazaqstan oblysynyń ákimi bop turǵan kezde Ońtústik Koreıadan onǵa jýyq ınvestor keldi. Solardyń bári kúngeıdiń tabıǵaty, aýa raıy jarys ótkizýge qolaıly ekenine keliskenimen, segiz metr tereńdikti kórip, raıynan qaıtyp, ketip qalǵan.
Jasyratyny joq, eski ıppodromnyń qazirgi zamannyń talabyna saı qyzmet kórsetýine múmkindigi joq. Onyń ústine jarty beldeýine etnoaýyl salyndy. Tastan qalanyp, bógetter jasaldy. Janýarlar júretin jol qysqardy. Qazir jattyǵýdy atshabardyń jarty alańynda jasap júrmiz. Al bul attardyń psıhıkasyna áser etip, minezi ózgerýde. Joldaǵy kedergilerdiń kesirinen óz jolynan adasyp, jarty joldan shyǵyp ketip jatady. Joldaǵy túrli kedergilerden mertigip, ár jarys saıyn keminde 4-5 attan aırylamyz. Odan bólek, ıpoterapııany túrli aýrýlardyń emi retinde damytý úshin jaǵdaı jetispeıdi. Qora-jaılarymyz da tar.
Vengrııaǵa barǵan kezde ıppodromǵa jergilikti halyq toıǵa barǵandaı kelip, jarystaryn joǵarǵy deńgeıde ótkizgenin kózimmen kórdim. Qytaıdaǵy qazaq ólkesindegi ortalyqtan 20 km jerge ornalasqan atshabary men atqorasyn kórseńiz, janyńyz jaı tabady. Eń bastysy, kórermenderdiń jaǵdaıy jasalǵan.
Al bizdegi eski ıppodrom Asqarovtyń kózindeı qymbat meken ekenine eshkimniń daýy joq, alaıda, ýaqyt óz buıryǵyn júrgizbeı turmaıdy.
Osy oraıda «jylqylarǵa da, sportshylarǵa da, kelýshi kórermenderge de, ıpoterapııamen aınalysatyndarǵa da jaıly zamanaýı, keń ıppodrom salynsa ǵoı» degen oı-maqsatymyzben bólisip kele jatqanymyzǵa birneshe jyldyń júzi boldy. Osyny eskergen Shymkent qalasynyń ákimi M.Áıtenov taıaýda eski ıppodromdy Almaty aınalma jolynyń boıyndaǵy Bozaryq shaǵynaýdanyna, shahardyń eń bıik núkteleriniń birine kóshirý týraly aıtty.
Jańa atshabar qyrdyń ústine oryn tepse, atqumar jandardyń búkil jaǵdaıyn jasaýǵa múmkindik týar edi. Shymkenttiń kireberis qaqpasy retindegi nysan jan-jaqtan keletin sportshylardyń ornalasqanyna da yńǵaıly bolar edi. Bıik dóńge salynatyn atshabardyń jalpy aýmaǵy 47 gektar bolmaq.
Jańa ıppodrom boıynsha birneshe joba usynylýda. Eń bastysy, jańa joba qonaqjaı oryn bolady. Mindetti túrde qonaqúı salynady. Jan-jaqtan jarysqa qatysatyn sportshylardyń otbasymen kelip, sol jerge qonyp, erteńine sportpen shuǵyldanýyna jaǵdaı jasalady.
Máselen, Nur-Sultan qalasynda sondaı múmkindikter bar.
Qazirgi ıppodromǵa kórermen 1,5 km jaıaý júrip barsa, jańa nusqasynda joldyń boıynan kiredi de jabyq alańqaıdyń ishinde rahattanyp otyryp tamashalaıtyn bolady.
Ǵanı AHMETBAEV
(Ulttyq sport túrlerinen balalar
men jasóspirimderdiń mamandandyrylǵan sport mektebiniń dırektory)
Foto avtory: Ómir Shynybekuly
