«Aq jol» partııasynyń Respýblıkalyq saılaýaldy shtabynyń otyrysy ótti dep habarlaıdy «Adyrna» ulttyq portaly partııanyń baspasóz qyzmetine silteme jasap.
Aıta keteıik, 2020 jyldyń 3 qarashasynda respýblıkalyq jáne partııanyń barlyq fılıaldarynda osyndaı aımaqtyq shtabtar quryldy. Respýblıkalyq shtabtyń basshysy - Azat Perýashev, al Bolat Ótepbaev pen Aıgúl Jumabaeva orynbasarlary bolyp taǵaıyndaldy. Shtabqa ortalyq apparattyń barlyq jaýapty qyzmetkerleri kirdi. Saılaý aldyndaǵy quryltaıdan keıin shtab quramyna partııalyq tizimdegi kandıdattar da engizildi.
Otyrys barysynda Azat Perýashev shtabtyń qazirgi uıymdastyrýshylyq jumysy týraly aıtyp berdi. BAQ-pen kelisim-sharttar jasalyp, úgit-nasıhat materıaldarynyń jetkilikti sany daıyndalyp, basyp shyǵaryldy jáne el óńirlerinde 317 banner ornatyldy.
«Is-sharalardyń jelilik kestesi epıdemıologııalyq jaǵdaıǵa baılanysty apta saıyn jańartylyp, túzetilip otyrady. Qazirgi ýaqytta senimdi tulǵalardyń tizimin tirkeý boıynsha belsendi jumys júrgizilýde, keshe shtab osy másele boıynsha keńes ótkizdi», - dep atap ótti ol.
Azat Perýashev áriptesterin úgit-nasıhat sharalaryn júrgizý kezinde bas sanıtarlyq dárigerdiń barlyq nusqaýlaryn múltiksiz saqtaýǵa shaqyrdy.
