Jyl saıyn gazballondy qondyrǵylardyń jarylysy men tarsylynyń 30-ǵa jýyq oqıǵasy tirkelse, munyń saldarynan shamamen 10 adam qaza tabady jáne 50-ge jýyq adam jaraqat alady. Mysaly 2018 jyly -39 jarylys bolyp, 4 adam qaza tapqan, 2019 jyly -27 jarylystyń saldary 10 adamdy ajal qushtyrǵan, 41 adamǵa zardabyn tıgizgen, 2020 jyldyń on aıynda 21 jarylys bolsa, 9 adam qaza taýyp, 38 adam zardap shekken. Qaza bolýdyń negizgi sebepteri turmystyq gaz qurylǵylaryn paıdalaný kezinde órt qaýipsizdigi talaptarynyń buzylýy, tútin jáne jeldetý arnalarynyń tartpaýy, gaz jabdyǵynyń tútin kanalymen jalǵastyrýshy qubyrlarynyń germetıkalyǵynyń nasharlaýy, japqyshty jabý, aqaýy bar peshter men gaz qazandyǵyn paıdalaný, úı-jaılardy jylytý úshin gaz plıtalaryn paıdalaný bolyp tabylady.
Kúni keshe gaz ballony jarylýy saldarynan, Elordadaǵy dámhanalardyń birinde de órt shyǵyp, adam ólimine ákelip soqqany belgili. Osyndaı qaıǵyly oqıǵa qaıtalanyp oryn almas úshin, «Adyrna» ulttyq portaly Qazaqstan Respýblıkasy Tótenshe jaǵdaı mınıstrligi usynǵan turmysta gaz jabdyqtaryn paıdalaný qaýipsizdigi boıynsha negizgi talaptardy eske salady.
Gazben jabdyqtaý júıeleri obektileriniń qaýipsizdigi jónindegi talaptarǵa sáıkes gaz toltyrylǵan ballondardy saqtaýǵa arnalǵan qoımalar jeńil úlgidegi jabyndary bar bir qabatty úı-jaılarda saqtalýy tıis.
Gazdardy saqtaýǵa arnalǵan qoımalardyń qabyrǵalary, aralyqtary, jabyndary otqa tózimdiliktiń II dárejesinen tómen emes, janbaıtyn materıaldardan jasalady, terezeleri men esikteri syrtqa qaraı ashylady.
Ballondarǵa arnalǵan qoıma úı-jaılarynyń bıiktigi edennen tóbe jabyndylarynyń astyńǵy kórinetin bólikterine deıin keminde 3,25 metrge teń bolady.
Qoımalardyń edenderi betki bóligi syrǵanamaıtyndaı tegis, al janǵysh gazdary bar ballondarǵa arnalǵan qoımalardyń edenderi olarǵa qandaı da bir zattar soǵylǵanda ushqynnyń shyǵýyn boldyrmaıtyn materıaldardan jasalýy tıis.
Qoımalarda olardaǵy ballondardy paıdalaný jónindegi nusqaýlyqtar, erejeler men plakattar ilinedi.
Gaz toltyrylǵan ballondarǵa arnalǵan qoımalardyń tabıǵı nemese jasandy jeldetkishi bolady.
Jarylys jáne órt qaýipti gazdary bar ballondarǵa arnalǵan qoımalar naızaǵaıdan qorǵaý júıesimen jaraqtalady.
Ornatylǵan tabandyqtary bar toltyrylǵan ballondar tik qalpynda saqtalady.
Tabandyqtary joq ballondar kóldeneńinen aǵash jıektemelerde nemese sórelerde kóldeneń qalpynda saqtalady.
Ballondardy qulaýdan saqtandyrý úshin olar jabdyqtalǵan uıalarǵa, torshalarǵa qoıylady nemese bógetpen qorshalady.
Tabandyqtary joq ballondar kóldeneńinen aǵash jıektemelerde nemese sórelerde kóldeneń qalpynda saqtalady.
Ashyq alańdarda saqtaǵanda tabandyqtary bar ballondardy kóldeneń qatarlar arasyna arqannan, qyrly bórenelerden nemese rezeńkeden jasalǵan tósemmen qatar-qatar qoıýǵa jol beriledi.
Ballondardy qatar-qatar qoıǵan kezde sońǵylarynyń bıiktigi 1,5 metrden astam bolmaýy tıis.
«Gaz jáne gazben jabdyqtaý týraly» Qazaqstan Respýblıkasynyń 2012 jylǵy 9 qańtardaǵy № 532-IV Zańyna sáıkes 2012 jyldyń qańtar aıynan bastap gaz jáne gazben jabdyqtaý salasynda áleýmettik ınfraqurylym obektilerinde (turmystyq jáne kommýnaldyq-turmystyq) gaz ballondar men gazdy paıdalaný jabdyqtaryn baqylaýdy jergilikti atqarýshy organdar júzege asyrady.
«Qazaqstan Respýblıkasynda tekserýlerge jáne profılaktıkalyq baqylaý men qadaǵalaýdy baryp júrgizýge moratorıı engizý týraly» Qazaqstan Respýblıkasy Prezıdentiniń 2019 jylǵy 26 jeltoqsandaǵy № 229 Jarlyǵyna sáıkes 2020 jylǵy 1 qańtardan bastap 2023 jylǵy 1 qańtarǵa deıin shaǵyn mıkrobıznes sýbektilerin tekserýlerdi jáne profılaktıkalyq baqylaý men qadaǵalaýdy baryp júrgizýdi toqtatty.
Tótenshe jaǵdaılar mınıstrligi azamattardy gaz ballondardy paıdalaný jáne órt qaýipsizdigi qaǵıdalaryn saqtaýǵa shaqyrady.
Al biz óz tarapymyzdan, qadaǵalaý júrgizilmeıdi eken dep, arqany keńge salýǵa bolmaıtyndyǵyn aıtqymyz keledi. Muny oryn alyp jatqan qaıǵyly oqıǵalar eske salyp turǵandaı.
Erke Jomart,
«Adyrna» ulttyq portaly
