Aqtóbe oblysynyń ákimi Ońdasyn Orazalınniń tóraǵalyǵymen ótken kezekti apparat otyrysynda óńirdegi mal qystatý kezeńine daıyndyqtyń barysy, paıdanylmaı jatqan jerlerdi aınalymǵa tartý máseleleri qaraldy. Jıynǵa oblys ákiminiń orynbasarlary, vıdeobaılanys arqyly qala, aýdan ákimderi qatysty. Aýyl sharýashylyǵy basqarmasynyń basshysy Qusaıyn Sársembaıdyń málimetinshe, Aqtóbe oblysy boıynsha 2020-2021 jj. mal qystatý kezeńine azyq qory jetkilikti mólsherde daıyndalǵan. Bul úshin oblys ákimi Ońdasyn Orazalınniń qoldaýymen 3,4 mlrd. teńge qarjy bólingen. Sondaı-aq, aımaq basshysynyń 1,5 jyldyq mal azyǵynyń qoryn, ıaǵnı 2 365,1 myń tn shóp daıyndaý tapsyrmasyna sáıkes, aýyl sharýashylyq qurylymdary tarapynan 2550,3 myń tn. shóp, 2,5 myń tn. pishendeme, 20,1 myń tn. súrlem men 10,1 tn saban ázirlengen. Daıyndalǵan shóptiń 1 554,1 myń tn-sy mal qystaqtaryna, 996,2 myń tn-sy turǵyndarǵa tasylyp alynyp, 39 559 aýlany tabıǵı shóppen qamtamasyz etti. Mal qystatý naýqanyna qajet etiletin shóp kólemi 1 683,1 myń tn. bolsa, qazirgi kezde mal azyǵymen qamtamasyz etý kórsetkishi 2 601 myń tn. nemese 152 %-dy quraıdy. Sondaı-aq, Aqtóbe óńirinde tórt túlik mal sany artqan. Qazirgi tańda oblysta IQM sany 527 208 basty quraıdy. 1 355 284 bas qoı- eshki, 155 500 bas jylqy, 19 341 bas túıe, 1 339 641 qus bar. Ótken jylmen salystyrǵanda MIQ 106,9%-ǵa, qoı-eshki- 103,9%-ǵa, jylqy-115,5%-ǵa, túıe-110,5%-ǵa artqan.Osy oraıda oblys ákiminiń orynbasary Amanǵalı Berdalın keıbir aýdandarda mal soıý alańdarynyń talapqa saı kelmeıtindigin atap ótti. Alǵa, Baıǵanın, Muǵaljar aýdandarynda zaman talabyna saı mal soıý alańdaryn salý qajettigi aıtyldy. «Mal qystatý barysynda erekshe kóńil bóletin jaǵdaı-ol mal tóldetý naýqanyna barynsha daıyn bolý. Qoldaǵy maldyń qońy men kúıin joǵaltpaı, tól kútilip otyrǵan árbir maldyń jyly qora, qajetti sý men jem-shóptiń jetkilikti kólemde berilýi erteńgi kútiletin tóldiń berik negizi ekendigin esten shyǵarmaý qajet, sondyqtan aýdan basshylary sharýalarmen birlese otyryp, mal qystatý kezeńinde árbir sharýashylyqpen qarym-qatynastyń bolýyn baqylańdar. Shalǵaı sharýashylyqtardyń jol qatynastary men baılanys júıeleriniń qalypty bolýyn qadaǵalap, azyq-túlik, janar-jaǵar maı kóleminiń jetkilikti mólsherde ekenin nazarda ustaýy qajet»,-dedi Ońdasyn Orazalın. Aqtóbe oblysynda jerdiń paıdalanylýy men qorǵalýyn baqylaý jónindegi basqarmasynyń basshysy Abdýhat Myrzalın jer ýchaskelerin nysanaly maqsatqa saı paıdalanylmaı otyrǵan menshik ıeleri jáne jer paıdalanýshylarymen aýqymdy jumystardyń jasalyp jatqandyǵyn baıandady.
