Fıl Djeı: Qanat Islam elıtaǵa shyǵý múmkindigin jiberip aldy

2291

Dańqty qazaq boksshysy Qanat Islam (27-0, 21 KO) - rýhty sportshy retinde jankúıerleri arasynda óte tanymal.   Alaıda, " Qanat Islam álemdegi eń myqty boksshylar qataryna kire almaıdy", - deıdi amerıkalyq WorldBoxingNews saıtynyń redaktory Fıl Djeı.

2012 jyly ótken London Olımpıadasyna barýdy maqsat tutqan onyń jolyn qytaılar kesken edi. Sebep: Qazaqstandaǵy qaǵazbastylyq kesirinen el azamattyǵyn ala almaı biraz ýaqyt joǵaltyp alǵandyqtan qytaılyq olımpıada komıteti onyń Qazaqstan atynan Londonǵa joldama berýge tabandy qarsy shyqqan edi.

Joǵaryda atap ótken Fıl Djeı Vesti.kz tilshisine bergen suhbatynda: "Qanat Islam qazir 36 jasta. Bir jyl boıy judyryqtaspady, al Ýoltermen keıingi jekpe-jeginde onsha jaqsy kórinbedi. Odan ne kútesizder? Menińshe, onyń bolashaǵy óte zor edi, biraq, elıtaǵa shyǵý múmkindigin jiberip aldy. Oǵan jaraqattar nemese basqa jaǵdaılar bóget boldy ma, ol jaǵyn bilmeımin. Aıtaıyn degenim, ol ýaqytyn erkin jumsaıtyndaı jas emes.

Birneshe tamasha jekpe-jek kórseterine kúmánim joq, alaıda, uly atana almas. Ol myqty jáne bolashaǵy zor bolǵan boksshy retinde este qalady", - deıdi.

Áýesqoı boksta Beıjiń Olımpıadasynda 69 keli salmaq boıynsha qola alqa taqqan ol, 2012 jylǵy London Olımpıadasyna barý múmkindiginen arıyrylǵan soń, elimizdegi "Astana arlans" klýbynda birer jyl tamasha óner kórsetti. Alań tórinen jarqyraı kórindi. Sodan kóp ótpen kásipqoı boksqa birjola aýysty, amerıka tórinde sharshy alańnyń shańyn qaqty, qarsylas shaq keltirmedi. Tek sońǵy birer jyldyqta ne sebep bolǵany belgisiz, jekpe-jek alańdarynan kórinbeı ketkeni jankúıerlerine túsiniksiz bolyp tur..

 

Ularbek DÁLEIULY,

"Adyrna" ulttyq portaly

Pikirler
Uqsas jańalyqtar