Jalǵan aqsha men shynaıy aqshany ajyratý ońaı - Ábishev

8398
Adyrna.kz Telegram

Banknottardyń qorǵanys elementteri týraly Ulttyq banktiń Qolma-qol aqsha aınalysy departamentiniń banknottar men monetalar saraptama basqarmasynyń bastyǵy Ashat Ábishev túsinikteme berdi.

Shyn banknotty jalǵan banknottan ajyratý úshin olardyń túpnusqalyǵynyń birneshe belgilerin bilý jetkilikti. Elimizdegi jalǵan banknottardyń negizgi bóligi túpnusqalyqtyń keıbir belgilerin ǵana ımıtaııalaıtyn jeńildetilgen tehnologııa boıynsha shyǵarylady.

Ashat Ábishevtiń aıtýynsha, mundaı qoldan jasalǵan banknotty arnaıy jabdyqtyń kómeginsiz-aq «sezin – qara – aýdaryp kór» ádisin qoldaný arqyly anyqtaýǵa bolady.

«Aldymen banknotty ustap seziný qajet. Banknot qaǵazy erekshe shytyrlaıdy. Barlyq banknottarda beder beretin arnaıy mór basylǵan. Eger «QAZAQSTAN ULTTYQ BANKI» degen ataýy nemese arhıtektýralyq beıneler, Qazaqstannyń kartasy boıynsha saýsaqpen júrgizip kórse bederdi sezýge bolady.

 

Sonymen qatar, barlyq banknottarda kózi nashar kóretin adamdarǵa arnalǵan belgiler bar, olar banknottyń tómengi bóliginde ornalasqan. Bular – ustap kórgende jaqsy ajyratýǵa bolatyn joǵary bederli elementter.

 

Ekinshiden banknotqa muqııat qaraý qajet.

Bastapqyda aqsha belgisiniń taza, aıqyn, kontrastty nemese las bolýyn, daqtarynyń bolýyn jalpy kózben kórip zerdeleý qajet. Banknotty jaryqqa qaratyp, ańyzdaǵy «Samuryq» qusy túrindegi sý belgisin jáne nomınaldyń sandyq beınesin kórýge bolady.

 

Dál osy sııaqty, jazýlary bar núktelik syzyqtar túrinde qaǵaz betinde paıda bolatyn magnıtti (metaldandyrylǵan) úzik jipti tekserý qajet. Ol birtutas bolýy kerek.

Úshinshiden,banknotty aýdaryp kórý kerek.

 

1000 teńgeden 20 000 teńgege deıingi banknottarda banknottyń kólbeý buryshyna qaraı túsin jasyldan altynǵa tústeske ózgertetin erekshe element bar. Banknotty ár túrli buryshtarda baıaý burǵan kezde element boıymen tústi jolaqtyń qozǵalysyn kórýge bolady.

 

2000 jáne 5000 teńgelik banknottardyń syrt jaǵynda golografııalyq jolaq bar. Gologrammadaǵy sýretter jarqyraıdy jáne dınamıkalyq áser etedi.

 

Bul úsh ádis sizge banknottyń shynaıylyǵyn arnaıy jabdyqsyz anyqtaýǵa kómektesedi», - deıdi banknottar men monetalar saraptama basqarmasynyń bastyǵy.

QazAqparat

Pikirler