Bügın, 2 qazan, Almatyda Qytai soty ömır boiy bas bostandyǧyn şekteuge ükım etken Ospan batyr ūrpaqtarynyŋ Qazaqstandaǧy tuystary el bilıgınen, halyqaralyq adam qūqyqtaryn qorǧau ūiymdarynan araşa sūrap baspasöz jiynyn ötkızdı, dep habarlaidy "Adyrna" ūlttyq portaly The Qazaq Times-ke sılteme jasap.
https://youtu.be/W8q716wwhcM
Almatydaǧy Adam Qūqyqtary men zaŋdylyqty saqtau Halyqaralyq Biurosynyŋ baspasöz zalynda ötken şaraǧa qoǧam qairatkerlerı men belsendılerı, ziialy qauym ökılderı jäne BAQ ökılderı qatysty.
Qytaida auyr aiyptar taǧylǧan Nūrlan Näbiūly, Naǧyz Mūhammedūly jäne Tolqyn Soǧysaiūly qatarly azamattarǧa ara sūrau maqsatyndaǧy baspasöz jiynyn atalǧan azamattardyŋ Qazaqstandaǧy tıkelei tuystary (otbasy müşelerı men jaqyn tuystary) ötkızıp otyr. Olardyŋ aituynşa Qytaidyŋ qūqyq qorǧau organdary tuystaryn negızssız aiyptaǧan jäne sotta da aiyptardyŋ dälelsızdıgıne qaramastan ükım şyǧarylǧan. Sondai-aq, olar sotta kuälık etuşılerdı ondaǧy qūqyq qorǧau organdary zorlyqpen jalǧan kuälık bergızgen dep sanaidy.
Qytaida aiyptalǧan azamattardyŋ bırı Tolqyn Soǧysaiūlynyŋ tuysy Ahat Äşudıŋ aituynşa atalǧan azamattarǧa auyr qinau körsetken. «18 aqpannan bastap aiaq-qolyna tok bailap 72 kün sabaǧan. Synbaǧan süiegı, ezılmegen etı qalmaǧan. Tıptı olardy sot otyrysyna alyp şyǧuǧa da densaulyqtary jaramai qalǧan. Bastaryn bürkep emhanaǧa aparyp, keiın jäne qinap sūraqqa tartqan», – deidı Ahat Äşu. Olarǧa taǧylǧan aiyptar turaly Ahat Äşu: «Josparly tuuǧa qarsy şyqqan», «qos tıldı oqytuǧa qarsy şyqqan», «Qazaqstannyŋ täuelızdık künın qūttyqtaǧan», «rulasy, atasy bolǧan üşın bandy atalǧan Ospandy därıptegen, sol arqyly ūiym qūryp, memlekettı bölşekteuge ūrynǧan» degen sekıldı jalalardy japqan», – dep körsetedı.
Aiyptaluşylardyŋ bırı Naǧyz Mūhammetūlynyŋ anasy Nazyken Bıkeiqyzy sözınde: «Ūlym Naǧyz Mūhammedūly 30 jyldai ükımet qyzmetınde ıstegen. 2017 jyly qyzmet üstınde joǧary qan qysymnan qūlap, jürek operasiiasyn jasatqan edı. Qazır jazyqsyz sottalyp otyr. Men Qazaqstan ükımetınen, halyqaralyq adam qūqyqtaryn qorǧau ūiymdarynan balama araşa boluyn sūraimyn», – dedı. Nūrlan Näbiūlynyŋ ınısı Örken Ospannyŋ aituynşa, atalǧan azamattardyŋ ısıne bailanysty QR Prezident äkımşılıgıne jäne QR SIM tarabyna bırneşe ret araşa sūrap hat joldaǧan. Alaida, bärıne bırdei «Bır eldıŋ ışkı ısı, bız aralasa almaimyz» degen jauap kelgen. Būdan tys adam qūqyǧyn qorǧauşy halyqaralyq ūiymdar men elımızdegı qoǧamdyq ūiymdarǧa da aryz, talap hattar joldaǧan. «Soŋǧy ret 2019 jyldyŋ jeltoqsan aiynda prezidentımız Qasym-Jomart Toqaevqa da bırqatar ziialy qauym ökılderı men saiasatkerlerdıŋ qolyn qoiyp osy mäsele boiynşa hat joldaǧan edık. Alaida, qazırge deiın naqty jauap kelgen joq», – deidı Örken Ospan. Ol jäne: «Qytaidaǧy būl nauqan bastalǧanyna 3-4 jyl bolǧanymen, bızdıŋ äuletımızge jasalyp jatqan qysymdar Ospan batyr atylǧannan keiıngı 70 jyl boiy jalǧasyp kele jatyr. Ospan babamyz, bılesızder 1951 jyly säuırde Ürımjı qalasynda atyldy, al balasy Şerdiman bır jarym jyldan keiın 1952 jyly qyrküiekte qaruyn tapsyryp baǧyndy. Osy kezde jasalǧan 11 tarmaqty kelısım bar. Ol kelısımde Ospan batyrdyŋ süiegın qaitaryp beruden tartyp, onyŋ ūrpaqtarynyŋ qudalanbaityny, būrynǧy ısterdıŋ quzastyrylmaityny da jazylǧan edı. Sol kelısım negızınde batyrdyŋ ūrpaqtary sol elde ömır sürıp keldı. Atalǧan üş azamattarda QKP özı tärbilegen memleket qyzmetkelerı boldy. Bärı de ükımette, oqu aǧartu jäne mädeniet salasynda ūzaq jyl qyzmet ettı. Al, olarǧa taǧylǧan aiyptardyŋ bärı negızsız», – dedı.
Jiynǧa qatysqan memleket jäne qoǧam qairatkerı, saiasatker Baltaş Tūrsymbaev sözınde «Ospan batyr babamyz qazaqtyŋ keleşegı üşın öz ömırın qiǧan adam. Sondyqtan onyŋ ūrpaǧyna araşa tüsu, ūltty qorǧau bilıktıŋ boryşy», – degen pıkırın bıldırdı.
Baspasöz jiynyn ūiymdastyrǧan Ospan batyrdyŋ Qazaqstandaǧy ūrpaqtary jäne aiyptalǧan azamattardyŋ özge tuystary Qazaqstan bilıgınen tys şeteldık jäne halyqaralyq adam qūqyǧyn qorǧau ūiymdarynan tuystaryna araşa sūraitynyn jetkızdı.
Ūqsas jaŋalyqtar
