Saǧat 15.00-degı mälımet boiynşa «Praimeriz» jüiesınıŋ jūmysy bır qalypqa tüstı. Partiialastardyŋ barlyǧy dauys bere alady, tehnikalyq ırkılıster şeşımın tapty.
Osy sätke deiın el kölemınde 390 myŋnan asa partiialyq öz taŋdauyn jasap ülgerdı. Būl – jüiede tırkelgen barlyq adamnyŋ jartysyna juyq, iaǧni 49%-dan astamy.
İnternetke kıru mümkındıgı joq jerlerde tūratyn partiialyqtar erteŋ, 3 qazanda arnaiy sailau uchaskelerınde qaǧaz biulletender arqyly dauys bere alady. Qolda bar aqparatqa säikes, 82 214 partiialyq qaǧaz biulleten arqyly dauys beru qūqyǧyn paidalanady.
Aqparattyq jüiedegı sūranystardy öŋdeuge bailanysty ırkılıster men qiyndyqtar boiynşa ahualdy jan-jaqty tüsındıre keteiın.
Elektrondy formatta dauys beru Qazaqstanda ǧana emes, bükıl Orta Aziiada tūŋǧyş ret ötkızılıp otyr. Praimerizdıŋ alǧaşqy künınen bastap bız jüiege tüsetın salmaqtyŋ asa auyr bolatynyn tüsındık.
Keşeden berı partiialyqtar men qoǧam tarapynyŋ nazary jappai praimerizde dauys beru barysyna audy. Bır mezette köp adamnyŋ aqparattyq jüiege kırıp otyruy tehnikalyq aqaulyqtar tudyryp jatyr.
Sonymen bırge kandidattar men olardyŋ senımdı tūlǧalary da onlain rejimınde dauys beru barysyn jıtı qadaǧalap otyrǧanyn bılemız. Keşeden berı jüiede tūraqty türde 50 myŋnan astam paidalanuşy otyr. Jelılık auyrtpalyq negızınen ekı baǧytta: dauys beru prosesı men nätijesın belgıleuge tüsıp tūr.
Ötken tünde aqparattyq jüienıŋ mamandary öndırtıp jūmys ıstedı. Sūranystarǧa oŋtailandyru jürgızıldı. Endı dauys beru jäne onyŋ nätijelerın qarau funksiialary ekı server men internet-saitqa bölındı.
Dauys beru https://vote.primaries.kz/ arnaiy bölımı arqyly jürgızılıp, al nätijelerı https://primaries.kz/ portalynda şyǧarylady.
Endı dauys beru nätijelerın primaries.kz saitynda ǧana köruge bolady. Sondai-aq, dauys beru nätijelerın öŋdeu men aralyq qorytyndylaryn şyǧaru kestesı de jaŋartyldy. Derekter ärbır 30 minut saiyn jaŋartylyp otyrady. Bır mezette öte auqymdy kölemdegı sūranystardyŋ tüsuıne bailanysty dauys beru nätijelerı baiau jükteluı mümkın.
Tehnikalyq qyzmet jūmysy täulıktık rejimge köşırıldı.
Taǧy da atap öteiın, «Praimeriz» jüiesı dauys berudıŋ qūpiialylyǧyn qamtamasyz etedı. Ärbır dauys esepke alynady, öŋdeledı jäne jüiede körsetıledı.
Qūrmettı partiialastar!
Praimerizde ügıt jūmystaryn jürgızu kezınde şynaiy bäsekelestık boldy dep sanaimyn. Dauys berudıŋ soŋǧy nätijelerı şyqqanǧa deiın älı uaqyt bar. Tūjyrym jasauǧa, qorytyndy şyǧaruǧa älı erte. Barşa praimeriz qatysuşylaryn ügıtteu qarqynyn bäseŋdetpei, soŋǧy sätke deiın ärbır dauys üşın küresuge şaqyramyn!
Dauys beruşılerdı mäjbürleuge jäne olarǧa qysym körsetuge jol beruge bolmaidy. Sız üşın şeşım qabyldauǧa eşkımnıŋ qaqysy joq! Būl – sızdıŋ qūqyǧyŋyz jäne partiianyŋ ǧana emes, elımızdıŋ bolaşaǧy üşın qabyldaityn şeşım üşın jeke jauapkerşılıgıŋız.
Ädıl dauys beru talabyn būzudyŋ qandai da bır jolyna qataŋ tosqauyl qoiyldy. Aiypty bolǧandarǧa tiıstı şara qoldanamyz. Partiialyq baqylau komitetı küşeitılgen rejimde jūmys jasauda. Ereje barşaǧa ortaq, eşkımge artyqşylyq berılmeidı.
Osy oraida, qadap aitatyn närse – jalaŋ aiyptau bolmauy tiıs. Barlyq aryz-şaǧymdy naqty faktılermen negızdeu qajet.
Qazırgı kezde Partiialyq baqylau komitetı Laura Malikovanyŋ mälımdemesınde aitylǧan dauys berudı būrmalau faktılerıne qatysty tekseru jürgızıp jatyr. Eger olar rastalsa, onda tärtıp būzuşylyqqa jol bergen kandidat dodadan şyǧarylatyn bolady.
Mysaly, Türkıstan jäne Aqmola oblystarynda partiialyqtardy dauys beruge mäjbürlemekşı bolǧan azamattar «Nur Otan»-nan şyǧarylyp, jauapkerşılıkke tartyldy. Nūr-Sūltan qalasynda praimerizge qatysuşy 3 kandidat tırkeuden şyǧyp qaldy. Olardyŋ qatarynda Almaty audandyq filialy töraǧasynyŋ bırınşı orynbasary da bar. «Praimeriz» aqparattyq jüiesınde partiia müşelerın tırkeu kezınde tärtıp būzuşylyqqa jol bergenı üşın Balqaş qalalyq filialy töraǧasynyŋ bırınşı orynbasaryna, «Ardager» BPŪ, «Gülder» BPŪ, «Stansiia Balhaş» BPŪ men «Şipager» BPŪ töraǧalaryna tärtıptık jaza qoldanyldy.
Tärtıp būzuşylyqtar men jazalaular turaly mälımetterdı aqparat qūraldary arqyly jariialap otyrmyz.
Kez kelgen tärtıp būzuşylyq boiynşa (800) 080 4441 (qoŋyrau şalu tegın) jedel jelısıne nemese komek@nurotan.kz elektrondy pochtasyna habarlasuǧa bolady.
Partiia praimerizdı barynşa aşyq, ädıl jäne şynaiy bäseke türınde ötkızuge müddelı.
Älıbek Äldenei
