Foto: Aqorda
Memleket basşysy Qasym-Jomart Toqaevqa Qorǧanys ministrlıgındegı jaǧdaidy keşendı tekseru jönındegı komissiianyŋ alǧaşqy qorytyndylary baiandaldy. Būl turaly Aqorda jazdy, dep habarlaidy "Adyrna".
Prezident komissiia müşelerımen kezdesıp, atqarylǧan jūmystyŋ alǧaşqy nätijelerın tyŋdady. Komissiia töraǧasy, Qauıpsızdık Keŋesı Töraǧasynyŋ orynbasary Aida Balaeva tekserıstıŋ negızgı baǧyttary boiynşa esep berdı.
Jiynda Maŋǧystau oblysynda bolǧan qaiǧyly oqiǧa Qaruly küşterdegı bırqatar jüielı mäselenıŋ baryn körsetkenı aityldy. Aldyn ala tergeu derekterı boiynşa, äskeri ıs-şaralardy ūiymdastyru jäne josparlau kezınde eleulı qatelıkterge jol berılgen. Sonymen bırge būǧan deiıngı basşylyq tarapynan tiıstı baqylau bolmaǧany anyqtalǧan.
Prezident alǧaşqy kadrlyq şeşımder qabyldanǧanyn atap öttı. Alaida äskeri qyzmetşılerdıŋ qazasyna kınälı barlyq lauazymdy tūlǧa zaŋ aiasynda jauapqa tartyluy kerek ekenın aitty. Būl mäsele Memleket basşysynyŋ jeke baqylauynda bolmaq.
Tekserıstıŋ alǧaşqy kezeŋı boiynşa qūqyq qorǧau organdary Qorǧanys ministrlıgıne qatysty 13 qylmystyq ıs qozǧaǧan. Olar memleket mülkın talan-tarajǧa salu, qyzmettık ökılettıktı asyra paidalanu jäne ministrlıkke qarasty ūiymdar men bölımşelerdegı özge de zaŋ būzuşylyqtarǧa bailanysty.
Maŋǧystaudaǧy qaiǧyly oqiǧany zerdeleu barysynda oqu-jattyǧulardy josparlau, täuekelderdı baǧalau, desant tüsırudı ūiymdastyru jäne äskeri qyzmetşılerdıŋ qauıpsızdıgın qamtamasyz etu kezınde bırqatar eleulı kemşılık bolǧany anyqtalǧan.
Qolbasşylyq qūramnyŋ salǧyrttyǧyna qatysty tergeu jalǧasyp jatyr. Qazır bes lauazymdy tūlǧa qamauǧa alynǧan. Tergeu aiaqtalǧannan keiın olardyŋ äreketıne qūqyqtyq baǧa berılmek.
Sonymen qatar äskeri tärtıp pen jeke qūram arasynda aldyn alu jūmystarynyŋ deŋgeiınde de kemşılıkter bary anyqtaldy. Äskerilerge älımjettık jasau jäne jarǧy talaptaryn būzu faktılerı boiynşa qylmystyq ıster qozǧalǧan.
Tekseru barysynda äskeri qauıpsızdık talaptaryn saqtau, äskeri qyzmet ötkeru jaǧdailary, tyldyq qamtamasyz etu jäne jeke qūrammen tärbie jūmysyn jürgızu mäselelerıne erekşe nazar audarylǧan.
Qasym-Jomart Toqaev komissiiaǧa Qorǧanys ministrlıgınıŋ jaŋa basşylyǧymen bırlesıp, anyqtalǧan kemşılıkterdı joiu boiynşa naqty ūsynystar äzırleudı tapsyrdy. Tekseru nätijelerı Qaruly küşterdı reformalau josparyn äzırleu kezınde eskerıluı tiıs.
Memleket basşysy qazırgı zamanǧy syn-qaterlerge tiımdı jauap bere alatyn jaŋa ülgıdegı armiia qalyptastyru qajettıgın atap öttı. Būl baǧytta äskeri tärtıptı küşeitu, qyzmetşılerge tiıstı jaǧdai jasau jäne qauıpsızdık deŋgeiın arttyru negızgı mındetterdıŋ bırı bolmaq.
Sonymen qatar keşendı tekserıstıŋ obektivtı ärı jan-jaqty jürgızıluı jäne onyŋ Qaruly küşterdıŋ jauyngerlık äzırlıgıne kerı äser etpeuı qajet ekenı aityldy.
Prezident Qaruly küşter qatarynda Konstitusiiada bekıtılgen «Zaŋ men tärtıp» qaǧidaty qataŋ saqtaluǧa tiıs ekenın atap öttı.
Komissiianyŋ jūmysy jalǧasyp jatyr.
Eske salaiyq, 24 qyrküiekte Maŋǧystau oblysynda Qazaqstan Qaruly küşterı Äskeri-teŋız küşterınıŋ oqu-jattyǧuy kezınde 17 äskeri qyzmetşını teŋız aǧyzyp äketken. Olar Kaspii jaǧalauynda oqu-jauyngerlık tapsyrma oryndap jatqanda aua raiy kürt naşarlap, jel küşeigen.
Qorǧanys ministrlıgınıŋ mälımetınşe, 14 äskeri qyzmetşı qaza tapqan, üşeuı qūtqaryldy.
Qaiǧyly oqiǧadan keiın 25 qyrküiek Qazaqstanda jalpyūlttyq aza tūtu künı bolyp jariialanǧan bolatyn.
