Tehasta týyp, ósken Marıon Lýna Brem 17 jasynda áskerı adamǵa kúıeýge shyǵady. Bir jyldan soń tuńǵysh uly dúnıege keledi. Otbasy tatý-tátti ómir súredi. Bes jyldan soń ekinshi uly dúnıe esigin ashty. 1984 jyly Lýna Brem 30 jasqa tolady. Ókinishtisi, eki jaqty onkologııa anyqtalyp, ol birneshe ota jasatady. Gınekologııalyq jáne anaryn alyp tastaý boıynsha... Osydan bastap hımıoterapııa bastalady. Sonyń saldarynan Marıon taz bop qalady. Dárigerler eki-úsh jyldyq ómiri qaldy dep boljam aıtady. Bar qıyndyqty kórip turyp, kúıeýi Marıondy tastap ketedi. Uldarynyń úlkeni 12-de, kishisi 7-de bolady. Eshqashan jumys istemegen jas kelinshek jalǵyz qalady. Onyń ústine ota úshin biraz qarjy moınyna qaryz bolyp ilinedi.
Úı tirliginen asyp eshteńe istep kórmegen áıel balalaryn qalaı asyraımyn dep oılanady. Bir kúni basy qatty aýyryp, vannadaǵy kafelde ustamasy ustap qalady. Asúıden uldarynyń kúlgen daýysyn estıdi. Sol sátte mıynda bir nárse qosylady. Qaıtsem de dertimnen saýyǵamyn dep ornynan turady.
Marıon kólik satý jaqsy tabys ákelýi múmkin ekenin biletin. Avtodıllerlerge baryp ózin usynady. Biraq mundaı iste ylǵı er adamdar jumyldyrylǵanyn kóredi. Eki apta ishinde Marıon 16 adamnan joq degen jaýap alady. Strategııasyn aýystyrmasa úmiti úziletinin sezedi. 17-shi ret jumys suraýdyń ornyna ol jumys berýshige: «Seniń kompanııań maǵan muqtaj, meni alsań, tabysqa kenelesiń» dep kesip aıtady. Ony jumysqa alady.
Kólik satýshy áıel retinde erlerge qaraǵanda birshama artyqshylyǵy bar ekenin ol birden túsindi. Kólik alýǵa kelgenderdiń jubaılaryna qandaı kólik alý qajetin túsindirip otyrady. Erkek satýshylar kóbine kúıeýlerdi satyp alýǵa kóndirýge tyrysatyn.
Alǵashqy eńbek jyly Lýna Brem jyl satýshysy degen ataqty alady. Oǵan erler taǵatyn Roleks saǵatyn qosyp beredi. Ony tek er adamdarǵa ǵana beredi eken. Sol sátte dárigerler onyń onkologııasy remıssııaǵa túskenin habarlaıdy. Marıon kúsh jınaı bastaıdy.
Odan keıingi eki jyl óte tabysty bolady. Ol ózin bastyq etip qoıýdy usynady. Biraq jumys berýshi «sen kólik satýdan ketseń, paıda túspeı qalady» dep onyń usynysyn qabyldamaı tastaıdy.
Biraq Marıon jańa jumys izdeýge shyǵady. Eki aptadan soń basqa bir avtodıller ony ózi qalaǵan laýazymǵa jumysqa alady. Sodan bastap onyń laýazymy kún ótken saıyn óse beredi.
Taǵy eki jyl ótkende ózi de avtodıller bolýǵa qarjy jınaýdy bastaıdy. Bar-joǵy $800 000 jetpeı turdy. Ol úshin $800 mıllıon degen túske ǵana kiretin soma bolatyn. Marıon taǵy oılanady. Bilek sybanady. Bıznes-jospar jazyp, oǵan óziniń ómirbaıanyn qosyp, ınvestor taýyp beretin 50 aýdıtorlyq kompanııaǵa taratady.
Eki aptadan soń ınvestor tabylady. Lýna Brem óziniń avtosalonyn ashady. Chrysler kólikterin satýmen shuǵyldanady. Sóıtip, 1989 jyly júrek taǵylǵan «Love Chrysler» saýdaǵa shyǵady. «Bul jaı júrek emes, bul bizdiń adamdardyń júregi, biz Tehasqa mahabbatymyzdy arnaımyz» degen uranmen óz isin bastaıdy.
Marıonnyń talpynysy eselep qaıtty. Búginde onyń obyry jazyldy. Eki avtosalony bar. Jyldyq aınalymy $45 mln. dollar. Kitap jazýdy unatady. Otyz jasynda kúrdeli ota jasatýy, kúıeýi tastap ketýi bar, dárigerler óledi dep kún sanaǵan adam emdelip, óz isin bastap, mıllıondap tabys tapqany tańqalarlyq jaǵdaı ma? Árıne!
Ol uldarynyń daýysyn estip, ómirin qolǵa aldy. Arzan parık kıip, erlerdiń álemine qadam basty. Uldaryna buryn-sońdy bere almaǵan baqytty balalyq shaqty syılady.
«Keıde jaı esik qaǵý azdyq etedi. Keıde esikti syndyryp kirý kerek» deıdi Marıon.
Aýdarǵan Shynar Ábilda
