Búgin Shymkentte Abaı Qunanbaıulynyń 175 jyldyǵy aıasynda qala ákiminiń birinshi orynbasary Shyńǵys Muqan men qalalyq máslıhat hatshysy Ǵanı Tashqaraev Abaı eskertkishine gúl shoqtaryn qoıdy. Sonymen qatar, olar Abaı murajaıynda bolyp, tanymdyq ekskýrsııa jasady. Artynda óshpes mura qaldyrǵan oıshyldy óskeleń urpaqqa keńinen dáripteý maqsatynda 1995 jyly Abaıdyń 150 jyldyq mereıtoıy qarsańynda saıabaq aldyna eskertkishi ornatylǵan bolatyn.
Budan ózge, Shymkentte Abaı Qunanbaıulynyń esimi berilgen 1 aýdan, 1 dańǵyl, kitaphana, murajaı, saıabaq bar.
Naqtyraq aıtqanda, 2004 jyly «Shymkent qalasynda aýdandar qurý týraly» Shymkent qalalyq máslıhatynyń sheshimi jáne ákimdik qaýlysymen Abaı aýdany quryldy. Aýdannyń aýmaǵy 50 myń gektarǵa jýyq. Búginde onda 323 myńǵa jýyq turǵyn qonystanǵan.
Al, uzyndyǵy 2 shaqyrymǵa sozylatyn dańǵylǵa Abaı esimi 1990 jyly berildi.
Sondaı-aq, 1964 jylda qurylǵan qalalyq ortalyq kitaphanaǵa 2005 jyly UR Úkimetiniń qaýlysyna sáıkes Abaı esimi berildi.
Shymkenttikterdiń súıikti demalys ornyna aınalyp úlgengen qazirgi Abaı saıabaǵy - 1967 jyly «50 let Oktıabrıa» saıabaǵy bolyp ashylǵan bolatyn. Ol 1991 jyly 23 mamyrda danyshpan aqyn Abaıdyń esimine ózgertildi. Onda Uly Otan soǵysy ardagerlerine arnalǵan alleıa, úlken dańq memorıaly, sýburqaq, shaǵyn sáýlet nysandary jáne merekelik is-sharalar ótkizýge arnalǵan sahna bar.
Sonymen qatar, 2009 jyldyń 22 qyrkúıeginde Abaı saıabaǵynan Hakim Abaı murajaıy ashyldy.
Shymkent qalasy ákiminiń baspasóz qyzmeti
