Áleýmettik jeli degen qyzyq qoı, jalpy. Aqparattyń, aıǵaı-shýdyń qaınaǵan ortasy. Sol áleýmettik jelide bizdiń shendi-shekpendilerdiń de birazy "otyrady". Rasymen ózderi otyr ma, joq áldekimdi «otyrǵyzǵan ba», ony bilý qıyndaý. Desek te, kimniń kim ekenin jazbasynan tanytatyn osy áleýmettik jelide depýtat Vladımır BOJKO óte belsendi «otyrady». Árbir pikirge jaýap berip, esesin eshkimge jibermeýge jantalasyp ta otyratynyn anyq baıqaýǵa bolady.
Mine, osy depýtatyńyz taıaýda feısbýk jelisinde qoǵam belsendilerimen qyzý aıtysty. Aıtysqanda da, Bojko tipti, ashyna aıtysty. «Kanıkýlda ne bitirip jatsyńdar?» degen qoǵam belsendisi Bahytjan TÓREǴOJINANYŃ suraǵyna burqyraı jónelgen Bojko: «Senderge esep berýge mindetti emespin! Meni saılaǵan sender emes!» dep saldy. Muny az kórseńiz, Vakeń: «Siz qurmettim bir nárseni shatastyryp otyrǵan sııaqtysyz. Maǵan daýys bergen joqsyz, saılaýshym emessiz. Jumys berýshim de siz emes» dep short kesipti. Bojkonyń bulaı kúrkireýi kimniń arqasynda?Depýtat halyq qalaýlysy dep jalaýlatamyz. Qalap alǵan depýtatymyzdyń sıqy osy ma?
Myna bir jazbasyna nazar aýdaryp kórińiz. Bojko synaǵysh azamattar týraly jazady da, onyń sol postyna Sake Azamat degen kisi bar bolǵany «Dardaı sheneýniksiz. Nege sonsha qate, qısynsyz jazasyz? Bálkim, sizge saýatty jazatyn kómekshi alǵan jón bolar» degen syńaıda pikir qaldyrady. Bul pikirge Bojkońyz atylyp shyǵyp «sizderge eshteńe jaqpaıdy. Reseılikterdiń qazaqstandyqtarǵa kómek bergeni de jaqpaıdy. Siz sııaqtylarǵa Ýkraınanyń qoqysqa tolǵan kórinisi unaıdy» dep bastap, uzaqqa deıin toqtaı almaıdy. Reseılik, Reseı týraly Azamattyń jazbasynan eshteńe baıqamasaq ta, Bojkonyń mynaý jazbasy onyń búıreginiń qaıda buratynyn kórsetpeı me? Ýkraınanyń bul jerde qatysy qansha? Sóziniń sońyn Vakeń «siz sııaqtylar el basqarýǵa kelse, eldi qurdymǵa ketiredi» degen syńaıda qorytady. Aý, sonda qalaı? Eldi qurdymǵa jibermeı otyrǵan Bojko ma, «bojko tektester» me? Óz ana tilimde qatesiz jazamyn degen azamattyń sózi me, ózi me Bojkonyń shamyna tıgen? Álde túpki maqsaty bılik basyna qazaq tilinde saýatty jaza biletinder jolamasyn degeni me?
Buǵan deıin qyzmet etken nán mekemelerde de Bojkonyń betinen qaıtarar pármen shyqpaǵan. Qazir de dál solaı eken. Kanıkýlynda ne isteıdi, nemen aınalysady halyqtyń sharýasy bolmaýǵa tıis. Esesine sol qara halyqtyń esebinen aı saıyn mıllıon teńgege jýyq jalaqy alyp júr. Siz ben bizdiń salyqqa tólegen aqshamyz bojkolardyń jalaqysyn quraıtynyn bilsek te, árbir tıynǵa suraý salýǵa haqymyz joq. Bojko ne aıtqysy keledi, aıta salady. Ne istegisi kelse de, odan esep suraýǵa eshkimniń quqyǵy joq.
Biraq Bojkonyń jalaqysy tutas saqtalyp, qajet bolsa, eselep óse berýi kerek. Karantın dep úıde qamalyp, jumyssyz, aqshasyz, endigi ashyǵa bastaǵan halyqpen Bojkonyń da isi joq, halyqtyń da Bojkoda sharýasy bolmaýy kerek. Bojko tek sheneýnik kreslosyn adaspaı, dál taýyp baryp, jaıǵassa kýanyp, shúkir aıtyp otyra berýimiz kerek-aý? Dári tappaı sandalsaq ta, kórshiniń sýyna tunshyǵyp jatsaq ta, aýrýdan ár buryshta ólip jatsaq ta, bojkolarǵa ún qatýǵa haqymyz joq eken. Olaı bolsa, bizge mundaı depýtattar ne úshin qajet? Aıyna mıllıondap jalaqysyn tólep, kresloǵa qonjıtyp otyrǵyzyp qoıý úshin be? Halyqpen isi joq, halqyna esep bermeıtin depýtattar sonda kimge kerek?
Merýert HÝSAINOVA,
"Adyrna" ulttyq portaly
