Búgin "Nur Otan" partııasy, Shymkent qalasy Ál-Farabı aýdandyq fılıalynyń tóraǵasy, aýdan ákimi Ǵ.Máýlenqulov bastaǵan qoǵamdyq monıtorıngtik top aýdan aýmaǵyndaǵy ornalasqan iri dárihanalarda bolyp, halyq suranysyndaǵy dári-dármekterdiń qoljetimdiligi men baǵasynyń turaqtylyǵyna zerdeleý jumystaryn júrgizdi.
Ondaǵy maqsat – dárihana sórelerinde dári-dármek tapshylyǵyn, baǵalarynyń sharyqtaý deńgeıin, satyp alynǵan dári-dármekke chek berilý-berilmeýin qadaǵalaý, sondaı-aq dári baǵalarynyń memleket bekitken baǵa turaqtylyǵy men halyqqa qoljetimdiligi boıynsha monıtorıng júrgizý.
Ál-Farabı aýdany aýmaǵynda jalpy 118 dárihana bar. Olardyń 32-si 24 saǵat jumys istese, qalǵan 86-sy kúndelikti tańerteńgi 9:00-den keshki 21:00-ge deıin qyzmet kórsetedi.
Monıtorıngtik toptyń zerdeleý jumystary barysynda keıbir qajetti dári-dármek sórelerde joq ekendigi anyqtaldy. Alaıda onda almastyrýshy dáriler bar ekeni belgili boldy. Tıisti mamandardyń málimetinshe, aldaǵy 3 kún ishinde barlyq dári-dármek halyqqa tolyq qoljetimdi bolatynyn málimdedi. Qazirgi ýaqytta "Birinshi dárihana", "Evrofarma" "Zerde" syndy dárihanalar júıesinde vırýstyń aldyn alýǵa arnalǵan dári-dármekterdiń 90% bar. Baǵasy turaqty.
Aıta ketsek, qazirgi tańda Shymkent qalasynda 10 iri kóterme dári-dármek jáne medıınalyq qural-jabdyq jetkizip berýshi mekemeler jumys atqarady. Búgingi kúni qalada bir aılyq dári-dármek qory bar, onyń ishinde dene qyzýyn tómendetetin 115 843 preparat, 136 352 vırýsqa qarsy preparat, 133 040 antıbıotıkter jáne 44 253 qorap «S vıtamınderi» bar.
Shymkent
