Jeti atasyn bilmeıtin qazaq joq. Dańqty babalar esimin maqtanysh etpeıtin qazaq ta kemde-kem. Deı tursaq ta, sol qaıtalanbas bitimdi ata-babalardyń ónegeli ómir joly men ómirsheń ósıetin ǵumyr boıyna shamshyraq etip aldyǵa ustanyp óter urpaqtar sabaqtastyǵy árkimniń peshenesine jazyla bermegen.
Týǵanyna bir ǵasyr tolyp otyrǵan 2-shi Dúnıejúzilik soǵysqa qatynasýshy maıdanger Jatqanbaı Shpekbaevtiń jarqyn beınesin jadymyzǵa oraltqan sátterde, mine, osyndaı tolǵanysty pikirler jan-dúnıemizdi baýrap alady. Jatqanbaı qarııa Keńester Odaǵy qurylýy, órkendeýi, quldyraýy, ydyrap joq bolýy men qazaq eliniń táýelsizdikke qol jetkizýi tarıhı kezeńderiniń barlyǵyna da kýáger bolyp uzaq ta maǵynaly ǵumyr keshti. Qazaq elin jaý shapqanda aldyńǵy sapta qaharmandyq kórsetken Dýlat Sámen batyr tikeleı babasy árýaǵy jelep-jebep, Shpekbaıuly Musahan men Musahanuly Jatqanbaı nemis fashısterimen qandy shaıqasta bir-birlerine jaqyn mańda júrip asqan erlik kórsetedi, aýyr jaraqat alady. Áke tilegi qabyl bolyp, Musahan qan maıdanda qaza tabady. Al birneshe jaraqat alsa da qudaıdyń keremetimen ajal oǵy darymaǵan ofıer Jatqanbaı keýdesin orden, medaldarǵa toltyryp týǵan ólkege abyroımen qaıtyp oralady. 1945 jyly Abaıdyń 100 jyldyq mereıtoıy qurmetine aty qoıylǵan Qaskeleńge qarasty Abaı aýylyn órkendetýge at salysqan Jatqanbaı jar qushyp, segiz ul-qyz súıgeni óz aldyna bir tarıh. Jer orta jastan asqan shaǵynda ómirlik qosaǵy Kúlımannan qapyda aırylyp qalyp, segiz qulynshaqtaryn áke ornyna áke, ana ornyna ana bolyp baǵyp-qaǵyp ósirgeni de aǵaıyn-týǵan, kórshi-kólem arasyndaǵy rýhanı ǵalamat erlik kúıinde ańyz áńgime bolyp aıtysady. Osylaısha aıly-jyldar syrǵyp aǵyp, 2006 jyly Jatqanbaı qarııa da ósip-óngen urpaqtary aldynda alǵa qoıǵan arman-maqsattary oryndalǵan áke keıpinde bul jalǵanmen qosh aıtysady. Áke-asqar taý! Ákeniń ornyn eshbir jaqyn týys basa almaq emes. Toqsanǵa taqaǵan ańyz-áke qazasy aldy alpysty alqymdaǵan ul-qyzdardy nedáýir eseńgiretip tastaıdy. Qaıǵynyń qara bulty birshama seıildi-aý degen shaqta aldyńǵy tolqyn eresekter bas bolyp, bir-birlerine joqtaý aıtysyp, toqtaý aıtysyp, qaıran ákeniń aqyret dúnıesine paıdasy tıer, erte jaryq jalǵanmen baquldasqan anaǵa baqı dúnıesinde sharapaty jetip jatar, ata-babalardy da qur qaldyrmas sharıǵat shartymen saýaby mol isterdi qalaısha birtindep atqaryssaq dep ózara keleli keńes qurysady. Dýlat ishindegi Botpaı atasy urpaqtary jerlengen eski qorymnyń Almaty-Qaskeleń tas joly betkeıi jaǵyndaǵy mal jaıylymyna aınalǵan bos bóligi bul oraıda qaıta-qaıta ózine nazardy aýdara beredi. Ne istese bolady, qalaı istese bolady?! Qalyń qonys, eldi-meken ishi emes, alaıda qarsy taý betkeıindegi saıajaı tarapyna biren-sarandap jańa sándi úıler boı kótere bastaǵanyna qaraǵanda, bolashaqta bul tóńirek qyzý qaınaǵan tirshiliktiń ortasyna aınalatyn sekildi. Endeshe, bul qabirstan betkeıine kópshilik qaýymǵa paıdasy tıer ǵımarattar salsa bolǵandaı eken. Eń bastysy nıetti durystaý, jaqsy pıǵyl bolsa qudaı taǵalanyń ózi joldy ashyp, oılamaǵan jerden rızyq-nesibeni molynan shashyp bermegi anyq. Osyndaı tolǵanysty sátterde elaǵalarymen birge bizder de qosymsha at salysyp, toq eter keńesterimizdi aıtyp, qalaısha uıymdastyrsa durys bolady degen maqsatta pikir-toqtamdarymyzdy batyl ortaǵa saldyq.
Eń birinshiden, bul tóńirekte meshit joqtyǵynan kúretamyr jolǵa jaqyn etip úlken meshit turǵyzý uıǵaryldy. Tolyqtaı qarjysy qolda turmasa da Allaǵa táýekel etip, onan soń jaqyn dos-jarandarǵa saýyn aıtylyp bolashaq meshittiń ornynda qazanshuńqyr qazylyp, sáýlettik jobasy mamandardyń qatynasýymen bekitilip, Marat Beısenbaev jetekshiligimen qyzý qarqyndy jumys bastalyp ketti. Osylaısha birese qaýyrt júrip, al keıde kibirtiktep toqtap qalyp, kópshiliktiń qoldap-demeýimen záýlim meshit eki jyl mejesinde boı kóterdi. Astanadan QR Ishki ister mınıstriniń orynbasary Alık Shpekbaev jumystan qoly qalt etkende dinı ǵımarat qurylysy barysyn tikeleı qadaǵalap, qaıyrymdylyq maqsattaǵy demeýshilerdi uıymdastyryp, nátıjede "Nur Musahan" meshiti tolyqtaı paıdalanýǵa berilip, jergilikti jamaǵatqa óz esigin aıqara ashty. Bizder óz tarapymyzdan Namanǵannan damolla Muhamed Ismaıyl Iýldashev basqarǵan sheberlerdi shaqyrtyp, oǵan jergilikti kásipker Tımýr Batıshev baýyrymyz kómek etip, meshittiń mıhrab bóligindegi qasbetin arabsha Quran aıattarymen órnektep jazýyna sebepshi boldyq. Qazaq eline kelgen saparyn paıdalanyp osy maman sheberler Almaty oblysy men Qaraǵandydaǵy birneshe jańa meshitterge Quran aıattaryn ádemilep jazyp beristi. "Nur Musahan" meshiti Jatqanbaı qarııanyń qan maıdannan oralmaı qalǵan ákesi atyn enshilep, jeti atanyń árýaqtaryn nurǵa bólep, QMDB resmı bólimshesi bolyp tirkelip, múptılik tarapynan bas ımam taǵaıyndaldy. Juma namaz ben aıt namazdary ǵana emes, bes ýaqyt namazǵa da nedáýir jamaǵat jınala bastaǵan kezde Musahan ata men Jatqanbaı marqumdardyń atynan bádel qajylyq jasalyp, Reseıdiń Saratov oblysy jerindegi Musahan Shpekbaevtiń qabir orny da tabylyp, Alık Jatqanbaıuly general bastaǵan bir top urpaqtary sol shalǵaıǵa zııarat etip baryp kelip, ata qabiri basynan alynǵan bir ýys topyraq bala qabiri topyraǵymen ulasyp, bul mekende de Musahan atyna sımvolıkalyq eskertkish-belgi qoıyldy. Oıdy oı qozǵaıdy, tilekti tilek jalǵaıdy demekshi, endi belsendi top meshit turǵyzýmen ǵana toqtap qalmaı, osy tóńirektegi kólemdi baý-baqshanyń shetin ala medirese jáne ashana keshenin salýǵa kirisip ketti. Jatqanbaı qarııanyń súıikti jary Kúlıman ananyń atyna qoıylǵan mediresede otyzǵa jýyq jas qarılar erteli-kesh Quran súrelerin jattap, eki júz kisilik syıymdylyǵy bar ashanada ár apta saıyn baqı bolǵandarǵa arnalyp as berile bastady. Medireseniń bir búıirinde qurban shalatyn arnaıy oryn daıyndalyp, Qurban aıt kezderinde osy tóńirektegi musylman qaýymǵa dinı rásim-joralǵylaryn kóńildegideı atqartatyn qyzmet jaıy paıda boldy. Osylaısha, bes ýaqyt azan shaqyrylyp, paryz namazdar oqylyp, Quran aıattary úzdiksiz jattalyp, atalmysh tóńirek kópshilik keletin orynǵa aınalyp, aı sanap emes kún sanap kórkeıe berdi, gúl jaınaı berdi!
Ekinshiden, meshit pen medirese qorshalyp, abattalyp, tolyqtaı qyzmetine kirisken soń aınala tóńirekke bir nárse jetpeıtindeı, taǵy da keshendi ulǵaıta túsý kerekteı áser-sezimge bóledi. Neler qıly pikir-usynystar aıtyldy. Kóńilge qonatyny bar, qonbaıtyny bar, sol alýan pikirlerdiń ishinen Ana taqyryby bólektenip alynyp, álem halyqtarynda kezdespeıtin Anaǵa arnalǵan eskertkish-belgi qoıylsa degen naqty usynys ortaǵa shyqty. Qazaqtyń salt-dástúri, sharıǵı talap-tilekteri eskerile kele Anaǵa ǵana arnalǵan murajaı bolsa, jáne onyń janynda Ana tulǵasyn jıyntyqtap somdaıtyn erekshe eskertkish boı kóterse degen pikir-baılam belsendi toptyń ortaq qoldaýyna ıe boldy. Eýropa úlgisindegi murajaı ǵımaraty sáýleti bekitilip, qurylysy tezdep qolǵa alyndy. Belgili kásipker Ábdıbek Bımendıev bastaǵan demeýshiler qoldaýymen kúrdeli is kún ótken saıyn ońaılana berdi. Murajaıdyń qarsy betinde tóbe basynda Anaǵa eskertkish orny daıyndalyp, bolashaqta osy keshenge zııarat etip kelýshilerge qolaı bolsyn dep jol jıegi de kúrdeli abattandyrylýǵa beıimdeldi. Bul kezeńde QR Prezıdenti ákimshiliginiń Huqyq qorǵaý júıesi bóliminiń meńgerýshisi qyzmetin atqarǵan Alık Jatqanbaıulynyń qyzmet bólmesi keı ýaqyttarda Anaǵa arnalǵan keshen jobasyn qyzý talqylaý ornyna da aınalyp ketetin. Bizder de óz usynysymyzdy bildirip, óz ıdeıamyzdy dáleldep, aıtqanymyzdan qaıtpaýǵa tyrysatynbyz. Nátıjede uzyna boıǵy Ana eskertkishi qasyna besik qoıý usynysymyz qabyldanyp, keshen mazmuny baıyı tústi. Eskertkish-belgi tóńiregindegi Ana bolmysyn ashatyn tańdamaly sózder de biraýyzdan qoldaý tapty. Bir jylǵa sozylǵan qyrýar izdenis nátıjesinde jas talant, sýretshi-músinshi Eldos Beksultan basqarǵan has sheberler ishki mazmuny syrt keıpine ulasqan Ana eskertkish-belgisin kópshilik kókeıindegisindeı dóp basyp somdaı bildi. Jańa murajaıdyń atyn "Anaǵa qurmet" dep usynýymyz da ár taraptaǵy jaýapty adamdar turǵysynan tolyq qoldaýǵa ıe boldy. Deı tursaq ta, jańa turpatty murajaı jasaýdaǵy bizderdiń barlyqtarymyzdy alda kútip turǵan orasan qıynshylyqtar tek bul ǵana emes edi. Klassıkalyq talǵam turǵysynan mýzeıdiń ári men sánin kirgizetin onyń ǵımaraty saltanaty emes, qandaı taqyrypqa arnalǵandyǵy da emes, eń bastysy kez-kelgen murajaıdyń basty qarýy-onyń jınaqtalǵan muraǵattar qory bolyp esepteledi. Mine, osy oraıda "Anaǵa qurmet" murajaıy ǵımaraty qurylysy bitisimen qańyraıǵan bos dálizge jınalǵan bir top belsendiler endi ne isterlerin bilmesten ańyraıyp turysyp qalǵan daǵdarysty beıneleri tap osy kúngideı kóz aldymyzda. Sasqan úırek artymen súńgıdi demekshi, bir azamat mýzeıdi jasaý qoldan kelmese uzyn dastarhan jaıyp ústine mol etip qurt-baýyrsaq shashyp, ashylý saltanatyn jasap, osy tóńirekte joq deńgeıde meıramhana jasap jibereıikte degeni de jadymyzda. Bizder bul oraıda óz pikirimizdi bildirip, kelesi bas qosýǵa Almatydaǵy Ortalyq murajaıdyń bas dırektory Nursan Álimbaı men sýretshi-sáýletshi Shámıl Qojahanovty, sol sııaqty belgili zerger, kóne muraǵattardy jınaqtaýshy Úsen Seıdálıevti de birge shaqyryp, qoldan kelgeninshe kómek-járdem kórsetýlerin ótinish ettik. Osylaısha, bilikti mamandardyń qoldap-qýattaýymen jańa murajaıdyń ekinshi tynysy ashyldy. Nursan murajaıdyń birinshi qabatyn kóne dáýirden qazirgi tańǵa deıingi qazaq áıel-analarynyń bolmys-bitimin ashýǵa arnaý usynysymyzdy qoldasa, ekinshi qabatty jeke áıel-analar tulǵalaryna arnaý usynysymyzdy Shámıl qoldap, muraǵattar saqtalyp qoıylatyn kórneki jıhazdardy jaraqtaýǵa Shámıl sheber dereý kirisip ketip, Úsen óz tarapynan kóptegen qundy muraǵattardy usynyp, jarty pishindegi kıiz úıdi barsha jabdyǵymen daıyndap, tıisinshe ótemaqylaryn da alyp, ózge kóptegen dostar da qoldaryna ilikken mol muraǵattaryn jetkizip, az ýaqyt ishinde qolda barǵa qanaǵat etip, "Anaǵa qurmet" murajaıy saltanatty túrde óz esigin kópshilik kórermenge aıqara ashty. Qarsy betkeıdegi Anaǵa arnalǵan eskertkish-belginiń de resmı ashylý saltanaty ótkizilip, lentasy qıyldy. Almaty men Qaskeleńnen, ózge de alys shalǵaıdan mektep oqýshylary men stýdentter, zııaly qaýym ókilderi men sheteldik týrıster legi bul tarapqa toqtaýsyz aǵylyp, dúnıejúzi boıynsha Anaǵa arnalǵan eń tuńǵysh murajaıdy tamashalaý tasqyny bastalyp ketti.
Úshinshiden, keshen aıasy ulǵaıǵan saıyn murajaıdyń syrt jaǵyndaǵy bir-eki ga jerge arnaıy saıabaq, kishigirim dendropark ornalastyrý qajettiligi óz-ózinen kelip týyndady. Sırek kezdesetin aǵash túrlerin otyrǵyzý, ózgeshe sándegi haýyz ornatý naýqany da bastalyp ketti. Keshki serýendeýge laıyqtalǵan ıreleń joldar da paıda boldy. Jergilikti kásipkerlerdiń qoldaýymen qazaqtyń kıiz úı pishinindegi meıramhanasyn salý jobasy da maquldanyp, tez arada jańa qurylys nysanasy boı kótere bastady. Sonadaıdan han túsetin 32 qanat kıiz úıdeı kórinetin sán-saltanaty kelisken qazaq úı-meıramhananyń resmı ashylý jıynyna mol adamdar jınalyp, kúnnen-kúnge keńeıip, erekshe sáýlet pen mazmundaǵy keshendi óz ornymen maqtaýshylar qatary kóbeıdi. Ómir-ózen, bir ornynda turyp qalmaq emes. Ýaqyt ótken saıyn osy ólkeniń týmalary-Sát Toqpaqbaev, Amangeldi Shabdarbaev syndy elge tanymal aldyńǵy býyn ókilderimen aqyldasa, keńese kele elimiz ben jerimizdi ǵasyrlar boıy qorǵap kelgen batyr babalarǵa arnap óz aldyna jeke memorıaldyq keshen turǵyzý ıdeıasy qyzý qoldaý tapty, dereý qolǵa alyndy. Alda jańa maqsat-mindetter qol bulǵap shaqyryp turdy.
Tórtinshiden, ár jyldaǵy 9 mamyr kúngi dástúrli eske alý, as berý jıynyndaǵy ortaq mámilemizge sáıkes, "Otandy qorǵaýshylarǵa!", "Zaıtnıkam Otechestva!"-degen alǵashqy shartty ataýǵa ıe bolǵan memorıaldyq keshenniń sáýlettik kelbetin túzý, qurylys júrgiziletin ornyn belgileý-daıyndaý, keshenniń jalpy qarjylyq shyǵyndaryn aıqyndaý, bastapqy ázirlik jumystaryn júrgizý naýqany bastalyp ketti. Birinshi alqaly májilistiń ózinde keshendi salý úshin arnaıy qor qurý qajettiligi máselesi ortaǵa qoıyldy. Burynda ondaǵan jyldar qaıyrymdylyq jumystarymen aınalysyp kele jatqan bizdiń "Qaǵanat" konsorıýmy jáne "Qaǵanat" ǵylymı-mádenı ortalyǵy bul oraıda barlyq demeýshiler atynan basty qarjy operatory bolyp taǵaıyndaldy. Qaýyrt ister bastalyp ketti. Sáýlettik joba tolyq aıaqtalǵansha, jeke menshiktegi jer telimderi memorıaldyq keshen úshin dep oblákimshilik tarapynan resmı qujattalǵansha Serik Donbaevtiń qurylys kompanııasynyń bilikti mamandary qatynasýymen alǵashqy jer ázirleý jumystary bastalyp ta ketti. 9 mamyrda bolashaq urpaqqa arnalǵan izgi tilekter jazylǵan kapsýlany quıyp ketken jańbyr astynda malmandaı sý bolyp turyp kópshilik belsendi qaýymmen birge bolashaq memorıaldy keshenniń jer astyna ementtep kómgenimiz de esimizde. Atalmysh keshen qurylysyna V.V.Sımachev pen Aıan Dúısembaev, Qanat Arbıev pen B.Ablıazımov, t.t. jeke tulǵalar qomaqty qarjy aýdaryp, keshenniń qurylys jumystary qarqyndy júrýine negizgi sebepker boldy. Qınalǵan sátterde Taldyqorǵandaǵy alqaly jıynda sol kezdegi vıe-premer Berdibek Saparbaev pen Almaty oblysynyń ákimi Amandyq Batalovtyń tótensheden qabyldaǵan sheshimderi demeý bolyp, endigi arada memlekettik-jeke menshik áriptestik negizdegi shartnamaǵa sáıkes oblystyq bıýdjetten de tikeleı bas merdigerge tıisti qarjy aýdaryla bastady. Sankt-Peterbordaǵy shpılderdiń sáýlettik sánin elestetetin memorıaldyq keshen qurylysy tolyqtaı aıaqtala bastaǵan sátte onyń ishki mazmunyn qalaı toltyrsaq degen úlken ýaıym aldan shyqty. Osyndaı qystalań kezeńde oblystyq mádenıet departamentiniń bastyǵy Aqan Ábdýalıev belgili zerger Shámıl Qojahanovpen aqyldasa-keńese otyryp, murajaıdyń ishki mazmunyn jaraqtaýdy qatań túrde óz baqylaýlaryna aldy. Birneshe aıǵa sozylǵan qajyrly eńbektiń nátıjesinde memorıaldyq keshenniń ishki bóligi baı mazmunǵa toldy. Ejelgi ǵundar jáne saq dáýirinen bastalǵan tarıh tasqa qashaldy. Osy kezeńde Qordaıdyń qyryq tonnalyq kesek tasyn kertip alyp Almaty irgesindegi sheberhanaǵa jetkizip, qazaqtyń susty keıiptegi batyr jigit pen qyzynyń túregep turǵan beınesin úsh-tórt aı boıyna asqan sheberlikpen qashap shyǵarǵan sýretshi-músinshi Eldos Beksultan bastaǵan mamandardyń tartý-syıy da daıyn bolyp, der ýaǵynda óz oryntaǵyna jaıǵasqan edi. Qoryta aıtqanda, sáttilik alǵa tartyp aýqymdy joba sońǵy máresine jetti. "Batyr babalar memorıalynyń" saltanatty ashylý rásimine oblys ákimi bastaǵan elge tanymal qaýym ókilderi jınalyp, Qarasaı aýdanynyń aqsaqaldary Alık Shpekbaev bastaǵan Jatqanbaı qarııa urpaqtaryna jáne onyń demeýshilik jasaǵan dos-joralaryna alǵystaryn jaýdyryp, aq batalaryn beristi. Arada birer aı salyp osy keshendi óz kózimen kórip tamashalaýǵa Almaty oblysynda resmı issaparmen júrgen Elbasy Nursultan Nazarbaev arnaıy at basyn buryp kelip, atqarylǵan qyrýar eńbekke úlken rızashylyq sezimin bildirdi. Memorıaldyq keshen ıdeıasyn ózge oblystarǵa da úlgi etip usynyp, munymen toqtap qalmaı, keshenmen jalǵastyryp bir myń jas óskin qaýymǵa arnalǵan zamanaýı Deneshynyqtyrý-saýyqtyrý keshenin turǵyzýdy da mindettep qoıdy. Elbasynyń óte oryndy usynys-pikiri bastamashyl qaýymdy jańa, tyń belesterdi baǵyndyrýǵa jeteledi. Al "Batyr babalar memorıaly" men "Anaǵa qurmet" murajaıy resmı túrde Almaty oblysy ákimshiligi qaraýyna qujattap ótkizilip, Mádenıet basqarmasy basshylary atalǵan keshenderdi zańdy túrde óz quzyretterine qabyldap aldy.
Besinshiden, Qarasaı aýdany halqy ǵana emes, oblys jáne shetten kelgen jurtshylyqtyń ózi rızashylyq sezimderin jasyrmaǵan bul keshen jańa jobamen tolyqty. Sáýlettik jobasyn Rústem Shalymbetov basqarǵan talantty jas sáýletshiler birneshe ózgerister men tolyqtyrýlar nátıjesinde támamdap bolǵan soń, "Qaǵanat" konsorıýmy men "Qaǵanat" ǵylymı-mádenı ortalyǵynyń ár óńirlerdegi turaqty demeýshiler toby alǵashqy qomaqty qarjyny qaıyrymdylyq negizde aýdaryp, tııanaqtalǵan kelisim-shart boıynsha Qaırat Orazbekov basqarǵan "Elıtstroı" qurylys kompanııasy Deneshynyqtyrý-saýyqtyrý kesheni qurylys jumystaryn bastap ketedi. Memlekettik-jeke menshik áriptestik zańnamasy aıasynda qolǵa alynǵan jańa joba oblystyq máslıhat tarapynan da qyzý qoldaý taýyp, alǵashqy qarjylandyrý is-sharalary bastalýda. Álbette, ústimizdegi jylda bul keshenniń qurylys jumystary da tolyqtaı aıaqtalyp, keshenge laıyqty at belgilenip, "Jetisý" fýtbol komandasy bastaǵan sportshylar óz jattyǵýlaryn bastap keterine senim mol. Odan keıingi kezeńde, jalǵyzilikti, qaraýshysy joq qarttarǵa arnalǵan pansıonat ashý da josparda bar. Mine, munyń barlyǵy da Jatqanbaı qarııa urpaqtarynyń izgi nıetteri men arman-maqsattarynan kelip týyndaǵan óte aýqymdy jobalar. Ákeniń balasy bolmaı, halyqtyń perzenti bolyp tárbıelengen nar tulǵalardyń keıingi urpaqqa úlgi bolyp qalsyn degen sheshimdi is-áreketterinen týyndap jatqan ǵasyrlyq úzdik jobalar. Mundaı birbetkeı keshenderge memleket turǵysynan úlken baǵa berip, bir top eńbegi ábden sińgen tulǵalardy memlekettik syılyqqa usynyp jatsa da esh artyqtyq etpes edi. Alaıda, taspen qashalyp ǵasyrlarǵa ǵumyr uzartqan osynaý keshender ólkesi talaı jas óskin urpaqtardyń kókeılerine ultshyldyq, otansúıgishtik, parasattylyq dánin egip, rýhanı jańǵyrtyp jatatyn bolsa, kóp jylǵy eńbektiń óteýi aqtalǵany, asyl murattar ómirde naqtyly júzege asqandyǵy! Sóz sońynda, ataqty Sámen batyr, odan taraǵan Musahan jaýynger jáne de onyń qaıyspas uly Jatqanbaı qarııanyń rýhy shat bolsyn dep Fatıha súresin oqyp saýabyn baǵyshtap qoıalyq. Ǵalamtorda osy aıtylǵan pikirlerimizge naqtyly dálel bolatyn ár kezeńdegi beınetaspalar men tanymdyq-zertteý maqalalardy taýyp tanysa alasyz. Tap osylaı qaıtalanbasa da sizder de óz týǵan ólkelerińizde osy ispettes ǵıbraty mol is-jobalardy batyl júzege asyra alasyz. Silkineıik, jigerleneıik, saýapty isterdi atqarýda esh tartynyp qalmaıyq!
Beıbit Saparaly,
jazýshy, qoǵam qaıratkeri
