Ekibastuzdyń Qnet-ti qoldaǵany nesi?!

986

Feısbýk betinde «Ne shyqsa da, Ekibastuzdan shyǵady!» degen zamanaýı «naqyl» bar. Onyń neden shyqqanyn kózi qaraqty jurttyń birazy jaqsy biledi. «Ár zamannyń tusynda bir surqyltaı» degendeıin, ár ákimniń tusynda Ekibastuzda bir surqyltaı bolyp turǵanyn qaıteıik.
Aty jaman dertpen kúres qyzyp, karantın jarııalanǵan shaqta Ekibastuz qalasy ákiminiń bir orynbasary shetel asyp tańyrqatsa («Qaýipti shaqta shetel asqan Qadyrbaeva qyzmetine laıyq pa?!»), ekinshisiniń 42500 teńgeniń jyryn túsindirý úshin jurtty bir jerge jınap, vırýsty qoldan taratý qaýpin tóndirgenin («Ekibastuz vırýsty qoldan kóbeıtpek pe?») buǵan deıin jazǵanbyz.
Jazýyn jazyp kelemiz ǵoı, biraq oǵan toqtaıtyn Ekibastuz ba?! Kúni keshe halyqaralyq balalardy qorǵaý kúninde daryndy balalardy parkte jıyp alyp, vırýs órship urǵanyna qaramastan, ákim Erjan Imanzaıpov maskasyz (qatysýshylardan da maska kııýdi talap etpesten) quttyqtady. Onyń quttyqtaý mátinniń qazaqshasyn umytyp qalyp, ári qaraı ejeleı jónelgeni óte kúlkili boldy. Bul masqara birden ıýtýb jelisine shyǵyp, bir táýlikte qalyń elge tarap úlgerdi.
Ony bylaı qoıa turyńyz, ekibastuzdyqtar endi QNet sııaqty qıturqy, saıasaty taza emes kompanııany nasıhattaýǵa aınalypty. Ol týraly qalanyń negizgi resmı basylymy – «Ekibastuz daýysy» gazetiniń feısbýktegi resmı paraqshasynan bildik. Basylym qyzmetkeri jarııa etken aqparattaǵy sýrette qabyrǵadaǵy Qnet degen jazý soqyrǵa taıaq ustatqandaı kórinip tur.
Kezinde osy Qnet-ten ekibastuzdyqtar ǵana emes, qazaqstandyq talaı azamat aldanyp japa shekken. Kóp adam baspanasyz qalǵan. Aldaǵy ýaqytta olardyń bergen az-maz syılyǵyna aldanǵan búgingi balalar muny maqtaýly, izgi kompanııa eken dep oılap, keleshekte quryǵyna túsýi ábden yqtımal. Óıtkeni ony resmı basylymnyń ózi nasıhattap otyr. Bul ózi qala basshysyn kezekti sógiske ıtermeleýdiń taǵy bir amaly emes pe eken degen oı keledi osyndaıda...

Bek Qusyman,

Ekibastuz qalasy

"Adyrna" ulttyq portaly

Pikirler
Redakııa tańdaýy