Eger ózen tartylyp qalsa, keıbir balyqtar tartylǵan sýdyń ornyndaǵy sazǵa batyp, kómilip jan saqtaıdy. Qashan jaýyn jaýady dep tózimmen kútedi. Eshkim búgin-erteń jańbyr jaýady dep ýáde bermeıdi. Keýip bara jatqan qarańǵy sazdyń ishinde qalý qorqynyshty ári qaýipti. Biraq sol balyqtar typyr etpeı, kúsh-qýatyn sarqyp almaıyn dep, tapjylmastan kútedi. Jańbyr jaýǵansha janym aman qalsa eken dep tileıdi.
Adamdar da sondaı. Olar da qarańǵy túnekte tózip ómir súre beredi. Typyr etip, artyq qımyl jasamaýǵa tyrysady. Dem alǵanyn sezirmeı, kózge kórinbeı, az sóılep tirlik qylady. Tek kerek kezinde bar ekenin kórsetedi. Olar da kútýmen ǵumyr ótkizedi. Biraq olarǵa da eshkim mahabbat keledi dep ýáde bergen joq. Úmitsiz shaıtan. Úmittený úshin de jan qýaty shyǵyndalmaq. Bul da artyq. Tek tiri qalýdy oılaýmen kún sanap ómir ótkizedi. Áıtpese, dem jetpeı nemquraılylardyń ortasynda ólip ketpek...
Sóıtip jyl artynan jyldar ótedi. Kúsh-qýaty kemı beredi. Saz balshyq keýip barady. Jasy barǵan saıyn ulǵaıady. Sosyn... Sosyn tropıkalyq aq nóser quıady. Toqtamaı neshe kún qasıetti aq jaýyn jaýady. Ózen arnasy tolady. Jelbezegińdi qulashtap ashyp, júzýge bolady. Qaıtadan ómir súresiń. Mahabbat ta dál osylaı. Kútpegen jerden kep, quıyndatyp áketedi. Óziniń uıyǵyna tartyp alady.
Adam shuńqyrdan shyǵyp, aýamen tynystaıdy. Qaýqary qalmaǵanyn sezedi. Biraq ómiri mahabbatpen tolysady. Ózenniń arnasy tolǵandaı, júrek meıirimmen tolysady. Adam serpiledi. Men mundaıdy talaı ret óz kózimmen kórdim. Qaıtadan keýde kere tynystaıdy. Qaıtadan ómirge qulshynysy artyp, kúsh-qaıraty eselenedi. Al janynda - súıikti adamy.
Ómir súrý úshin bar keregi sol ǵana - mahabbat pen súıiktiń. Bir kúni jaýyn báribir jaýady. Tek kúte bil. Úmitińdi úkile. Úmit etken abzal, biz qansha degenmen balyq emespiz ǵoı. Bálkim, olar da ishteı úmittenetin shyǵar, úmiti óshpegen soń tiri qalyp jatqan bolar...
A.V.Kırıanova
Aýdarǵan Shynar Ábilda
"Adyrna" ulttyq portaly
