"Adyrna" ulttyq-etnografııalyq birlestigi" qoǵamdyq qorynyń uıymdastyrýymen Altaı Respýblıkasynan kelgen ónerpazdar Yrystý Mecheshev pen Altyn-Aı Baratovalar men qazaq ánshileri Jolaman Qujımanov, Erkin Nurhanov, Baqtııar Aqymjanov «Dáýlet» sharýa qojalyǵynyń qymyzhanasynda bas qosyp, tájirıbe almasty. Sharaǵa nıderlandııalyq túriktanýshy ǵalym Bilge Ózel de qatysyp, qazaqtyń erekshe darhandyǵyna razy boldy.
Sheteldik qonaqtar biraz ýaqyt buryn elimizge kelgen. Eki-úsh kúnnen soń Qyrǵyzstanǵa saparlap ketti. Endi, mine, saparlaryn aıaqtap, qazaq jerine qaıta taban tirep otyr. "Dáýlet" sharýa qojalyǵynyń dırektory Ótemis Mahanovtyń zaıyby, ot anasy Márııam apamyz qonaqtarǵa et asyp, qazy-qartasy men qymyzyn usyndy. «Qyrǵyzda da qymyzǵa qaryq boldyq, biraq osy qymyzdyń dámindeı bolmady», – degen qonaqtar úı ıesine yrzalyǵyn jetkizdi. Kóptegen jyldar boıy jylqy sharýashylyǵymen aınalysyp kele jatqan Ótemis aǵa jylqynyń qasıetteri men qymyz baptaý ádisteri týraly áńgimelep berdi. Betpaqdalany kesip ótip, mal aıdaǵan aqsaqaldyń áserli áńgimesin tyńdaı otyryp, tabaq-tabaq etke bas qoıdyq. Astan keıin áńgime ózegi ánge aýysty. Ándi kez kelgen jerde tyńdaýǵa bolar. Biraq, týysqan eki eldiń ánshileri alma-kezek án salǵan jerde otyrý, tipti, tamasha eken. Yrystý men Altyn-Aı «Qulyn», «Maadaı Qara», «Jylqy» sekildi shyǵarmalaryn oryndasa, J.Qujımanov halyq áni «Eki jırendi», E.Nurhanov Úkili Ybyraıdyń «Qaldyrǵanyn», B.Aqymjanov Birjan saldyń «On saýsaǵyn», Berikboldyń «Aǵash aıaǵyn», «Nartaıdyń termesin» áýeletti. Dástúrli ónerge janashyrlyqpen qaraıtyn Ótemis aǵa eki eldiń dástúrli ánshilerin bir dastarhan basyna jınap, olardyń ózara pikir almasyp, tájirıbelerimen bólisýine múmkindik jasady.
Jasulan NAÝRYZÁLI
