«adyrna.kz» ulttyq portaly ujymy kóktemmen birge kelip jetken 8 naýryz Halyqaralyq áıelder kúnimen aq kımeshekti apalardy, ardaqty analardy, aıaýly qyzdardy shyn júrekpen quttyqtaıdy.
Osy oraıda qazaqtyń tanymal aqyny Ulyqbek Esdáýlet bastaǵan aqyndardyń jyr shashýyn usynamyz!
Áıelderge madaq
(ázil-shyny aralas)
Áıel degen – súgiret tamyp túsken ǵaryshtan,
Áıel degen - qudiret jaratylǵan namystan.
Áıel barsa jumaqqa aınalady Sibiriń,
Áıel barda synaqqa aınalady ǵumyryń.
Áıel degen tuǵyryń, onsyz ónbes túbiriń,
Baılanysty áıelge sútpen sińer bilimiń.
Áıel degen - danyshpan, áıel degen - án-uran,
Áıel degen - arystan, áıel degen - qabylan.
Áıel degen - aldaspan, ustaý qıyn sabynan,
Myqty ustasań sabynan, túgendeler qazynań.
Áıel degen – arǵymaq, sıpatpaıtyn jalynan,
Bir ustatsa jalynan er baqytty, baǵylan.
Áıel keıde - aradaı, shaqqanyna qaramaı,
Tata qalsań balynan, tatqyń keler taǵy dám...
Bulbul bezbes baǵynan,
Qulan qashpas qaǵynan,
Alystasa saǵynam, jaqyndasa shabylam,
Áıelge bas ıemin, áıelderge jaǵynam.
Áıelderdi súıemin, súıemin de tabynam;
Áıel degen jylylyq, máni tereń án uǵam,
Áıel degen sulýlyq, nur taraǵan shamynan.
Áıelderdiń bárin de, barlyǵyn da súıemin,
Keıbir kezde jańylam, súıgenderdiń sanynan...
Áıel – jumbaq,
Jumbaǵyn sheshemin dep janyǵam,
Áıel – ertek,
Ertekke sengen kóńil shadyman.
Áıel – juldyz,
Juldyzǵa jetemin dep sabylam,
Áıel – jazmysh, peshene, taǵdyrymdy tanyǵam;
Áıel degen kitapty túsine almaı qamyǵam,
Áıel bitken butaqty ıgim kelip qaǵynam,
Alam ba dep syndyryp, syılastyqqa baǵynam,
Kóbelekteı kólbeńdep, kete almaımyn janynan;
Áıel kirer esiktiń tutqasy bop qaǵylam,
Ol terbegen besiktiń shyraǵy bop jaǵylam.
Mahabbat pen shapaǵat, Áıel - mazmun, maǵynam,
Maǵynasyz tirlikti súrip tipti naǵylam?!
Áıel degen patshanyń tabylaıyq mańynan,
Ańdaýsyzda qulatyp almaıyqshy taǵynan...
Ulyqbek Esdálet
* * *
Áıel-gúl sekildi...
Úzýge,taptaýǵa bolmaıdy!
Tipti táj sekildi,
Jasyryp,saqtaýǵa bolmaıdy!
Keıde áıel-tús tektes...
Oıanyp ketkende tappaıtyn!
Máńgilik qozǵalys,
Dem almas,jatpaıtyn.
Keıde áıel-otqa da uqsaıdy!
Alystan súıdirer,jaqynnan kúıdirer...
Qobyzdyń úni de sııaqty...
Qap-qara tasty da ıdirer.
Keıde áıel-aýa da sekildi!
Bar-joǵy bilinbes...
Qazynań qasyńda júretin
Eshqashan búlinbes!
Áıelder álemi-ádemi
Kózińdi soratyn kórikti!
Áıelder-mahabbat túrmesi
Erkekter-tutqyny erikti!
Áıelder,áıelder,áıelder
Aýyrtar erkekter júregin...
Osynaý meıramda senderge,
MEN BAQYT TILEDIM!
Serik Elikbaı
Qyzdar úshin...
Kúnge aınalyp ketetuǵyn kúlgende,
Qyz degeniń qyzǵaldaq ǵoı bilgenge.
Qyzdar úshin – jalpaq álem jaıqalyp,
Qyzdar úshin – terbeledi gúlder de.
Kózdi salyp qyrattarǵa, kók belge,
Qyz arqyly oralamyz ótkenge.
Qyzdar úshin – tutas álem túrlenip,
Qyzdar úshin – keledi eken kóktem de.
Mahabbattan asqan sirá, kúsh bar ma,
Ne jetedi sulýlyqty qushqanǵa?!
Qanat qaǵyp qońyr kúzde attanǵan,
Qyzdar úshin – oralady qustar da.
Araılanyp asylǵanda tań belge,
Birer sátke oılanyp kór mán ber de.
Qyzdar úshin – mynaý álem jyrlanyp,
Qyzdar úshin – shyrqalady ánder de.
Burymdarǵa jasyrǵandaı uıatty,
Jylǵalardan bulaqtar da jıi aqty.
Shartarapty quıqyljytqan qus úni
Syńǵyrlaǵan qyz kúlkisi sııaqty.
Kóńilińniń kermesinen kún shyǵyp,
Umtylady dúnıege qulshynyp...
Qyzdarmenen qaıyrly eken dúnıe,
Qyzdarmenen kórikti eken tirshilik!
Álibek Shegebaı
* * *
Arýlardyń meıramynda qar jaýyp,
Kóktem taǵy qaldy qystan aldanyp...
Onsyz da tym qataldaý tirlikte,
Jylý izdep jaýradyq.
Sezimderdi oıatatyn nazdanyp,
Kóńilderi kóktem bolyp, jaz bolyp,
Júreginiń jylýymen Arýlar,
Eritedi qardy anyq!
Mahabbatqa qanshama jyr arnadyq,
Úmitterge úmitterdi jalǵadyq.
Bir jylylyq seziledi meıramnan,
Tursa-daǵy qar jaýyp...
Almat ISÁDIL
