"Jas Otandyqtar" tarıhı tanymyn arttyrdy

2103
Adyrna.kz Telegram

«Nur Otan» partııasynyń Jetisý aýdandyq fılıalynda 1916 jylǵy ult-azattyq kóterilisiniń 100 jyldyǵyna oraı, «Alash arystary ult-azattyq kóterilisi barysynda» degen taqyryppen dóńgelek ústel ótti. Bul sharany Almaty qalalyq Ishki saıasat basqarmasynyń qoldaýymen «Adyrna» ulttyq-etnografııalyq birlestigi uıymbastyrdy.

Onda arnaıy shaqyrylǵan tarıhshylar Shámek Tileýbaev pen Rashıd Orazov baıandama jasap, kóptegen tarıhı derektermen oı bólisti. Mysaly, «Amangeldi Imanov  Mirjaqyp Dýlatovtyń qolynan qaza tapqan» degen qańqý sóz aıtylyp kelgeni jasyryn emes. Al shyndyǵynda, M.Dýlatov  A.Imanovty ustatyp, túrmege qamattyryp qoıǵanymen, odan belgisiz kúshterdiń kıligýi áserinen aırylyp qaldyq» – degen Shámek Tileýbaev odan ári M.Dýlatovtyń jazǵan hatymen tanystyrdy. Bul rette ol «Alash kósemderiniń biri kóterilis basshysyn óltirdi» degen sóz halyqty alashtyqtarǵa qarsy qoıýdyń áreketinen týǵandyǵyn alǵa tartty.

«Jas Otan» jastar qanatynyń músheleri jınalǵan bul sharaǵa dástúrli ánshiler J.Qujımanov, E.Nurhanov, J.Saqaılar da belsene atsalysty. Olar ult-azattyq kóterilis tusynda shyqqan «On altynshy jyl» (Samaltaý), «Alash marshy» jáne «Jigitter» ánderin áýelete shyrqady. Jastar dástúrli ánshilerdiń ónerine tánti boldy. Soǵan oraı «Bizge, jastarǵa, tarıhymyzdy tanyp-bilýdiń mańyzy zor», – deıdi «Jas Otan» jastar qanatynyń jetekshisi Almat Ásenov. Sóıtip, bul kúni jastardyń óz tarıhyn tanyp-bilýge degen qulshynysyn kórip, kóńilimiz bir marqaıyp qaldy.


Jasulan NAÝRYZÁLI,

"ALMATY AQShAMY"

 

 

Pikirler