Semeı qalasynda muǵalimniń qalalyq shyrshany bezendirý kezinde bıikten qulap, aýyr jaraqat alý oqıǵasy boıynsha tergeý jalǵasýda. Qalalyq ákimniń orynbasary Araıbek Hamzaev osy is boıynsha kúdikti dep tanyldy, dep habarlaıdy "Adyrna" ulttyq portaly.
Bas prokýratýranyń málimetinshe, tergeý "aýyr zardaptarǵa ákep soqqan bılikti nemese laýazymdyq ókilettikterdi asyra paıdalaný" baby boıynsha júrgizilip jatyr. Ákim orynbasaryna qatysty tergeý ótken jyldyń 27 jeltoqsanynda bastalǵan. Ol muǵalimderdi qyzmettik mindetterine kirmeıtin jumysqa tartqany úshin aıyptalyp otyr.
Eske sala keteıik, 21 jeltoqsan kúni Semeıde qalalyq shyrshany bezendirý kezinde muǵalim Qýat Aıtqalı bıikten qulap, aýyr jaraqat alǵan bolatyn. Bul oqıǵa qoǵamda úlken narazylyq týǵyzyp, oqý-aǵartý mınıstri Ǵanı Beısembaev muǵalimderdi óz mindetine jatpaıtyn jumystarǵa tartýǵa bolmaıtynyn qatań eskertken edi.
8 qańtarda mınıstr muǵalimniń aýrýhanadan shyǵarylǵanyn málimdedi. Qazirgi ýaqytta oqıǵaǵa jaýaptylardyń is-áreketterine quqyqtyq baǵa berilip jatyr.
