Ótken zamanda bir saıasatshy tor quryp qoısa, toryna kishkene bir torǵaı túsip qalypty. Torǵaıdy adam qolyna ustap úıine apara jatsa, torǵaı tilge kelip bylaı depti:
- Men kishkene torǵaımyn, soıýǵa jaramaımyn, qapasqa salsań qusalyqpen ólemin. Meni erkime qoıa ber, keń dúnıege jiber. Aqysyna sizge eki aýyz aqyl aıtaıyn, – depti.
- Káne, aqylyńdy aıt, – depti adam.
- Jaraıdy, bir aýyzyn qolynda, bir aýyzyn jerge túsken soń aıtaıyn. Óıtkeni qos qoldap qysyp turǵanda, ókpem qysylyp eshteńe aıta almaımyn, – depti torǵaı.
Ańshy bosatypty.
- Birinshi – ótken iske ókinbe, ekinshi-kózben kórmeı senbe! – depti. Torǵaı anadaı jerge qonyp otyryp: – sen eshteńeni bilmediń, meniń bótegemde judyryqtaı gaýhar bar edi, – deıdi. Adam qonyp otyrǵan torǵaıdy ustaýǵa tura umtylypty. Torǵaı ár jerge ushyp qonyp ustatpaıdy. Adam qýyp qoımaǵan soń adamǵa bylaı deıdi: «Meniń jańaǵy aıtqan ósıetime túsinbepsiń, óziń aqylyńa salshy, meniń ózim judyryqtaı joqpyn, meniń bótegeme ondaı zat qalaı syıady? Bul bir. Ekinshi – men saǵan ustatpaımyn, qanatym bar. Sondyqtan ótken iske ókinbe» – dep ushyp ketipti.
