Baıaǵy ótken zamanda Qaǵanaq bas, Qyl keńirdek, Shı borbaı úsheýi joldas eken. Bir kúni bular bir toqty urlap, aıdalaǵa aparyp satypty. Toqtyny butarlap, etin qazanǵa salaıyn dep jatyp, Qaǵanaq basqa:
- Jynyn tógip kel, – dep, qaryndy beripti.
Qaǵanaq bas qaryndy tysqa alyp shyqqanda, qara shybyn qarynǵa da, Qaǵanaq bastyń basyna da qaptaı úımelepti. Basyndaǵy shybyndy qoryp, qaǵamyn dep, Qaǵanaq bas qolyn qaǵys siltep, óziniń basyn uryp alypty. Pııaladaı juqa tóbesi oıylyp, sharana shekesi shart ketipti. Jumyrtqadaı juqa bas jarylyp, jan beripti.
«Qaǵanaq bas qalaısha keshikti?» – dep, Shı borbaı dalaǵa shyǵa kelse, ólip jatqan Qaǵanaq basty kóre salyp:
- Áı? áttegen-aı! – dep, eki qolymenen eki sanyn salyp qalǵanda, shıdeı borbaıy short etip, ol da múrdem ketipti.
Shı borbaıdyń daýysyn estip, Qyl keńirdek syrtqa júgirip shyǵady da, ólip jatqan eki joldasyn kórip:
- Oıbaı, baýyrlarym-aı! – dep daýystaı bergende, óziniń qyl keńirdegi qylǵynyp, tynys ala almaı úzilip ketipti.
