Tól merekemizdiń balalarymyzǵa esh qatysy joq pa?

2451
Adyrna.kz Telegram

Kez kelgen mereke perishte kóńildi balalarmen qyzyq. Ertegideı keıipkerlerimen kórikti. Aıaz atasymen, Aqshaqarymen «Novyı godty» súıip óstik, olardyń syılyǵyn saǵyna kúttik. Endi túsindik, ol Eýropanyń meıramy eken, bizdiń tól meıramymyz Naýryz eken… Al endi osynaý Ulystyń uly kúninde biz balalarymyzǵa ne syılyq jasap jatyrmyz? Bizdiń meıramda nege balalarǵa arnalǵan keıipker joq? Álde, tól merekemizdiń balalarymyzǵa esh qatysy joq pa?    

Qudaıǵa shúkir, Qyzyr ata, Jeztyrnaq, Periniń qyzy, Taý soǵar, Jelaıaq, batyrlar men sulý da dana arýlarymyzdy arqaý etken aýyz ádebıetimizde keıipkerler jetip artylady. Tek olarǵa laıyqty kıim tiktirip, qoıylym qoıý jaǵy aqsap tur. Jańa jylda jarq-jurq etken áshekeı kóp. Bala kóńilge ol da aldanysh. Bizdiń ulttyq oıýlarmen úı bólmelerin, qala kóshelerin bezendirý ádetke aınalsa da, quba qup. Kún men túnniń teńelgen ǵajaıyp bul kúnde balalarymyzǵa nege syılyq syılamaımyz? Mysaly, ony Qyzyr atanyń  arnaıy syılyǵy dep tartý etseńiz, sábı sanasy Qyzyr atany máńgilikke jadynda saqtaıdy emes pe? Balalar Ulys toıy týraly óleńder jattap, ony Qyzyr atanyń aldynda aıtyp berse, nur ústine nur bolmaı ma? Qyzyr atany qazaqtyń árbir otbasy saǵynyp kútetin kún kúnge jetýge jazsyn dep tileımiz! 


Arman ÁÝBÁKIR 

 

Pikirler