Alǵashqy «Altyn adam» Almaty qalasynan 50 km shaqyrym jerdegi Esik ózeniniń boıynan 1970 jyly arheologııalyq qazba kezinde (K.Aqyshev, B.Nurmuhanbetov) kóne qorymnan tabylǵanyn bilemiz. Qazir «Altyn adamdardyń» sany altaýǵa jetipti. Qudaı, qazaqqa amandyǵyn berse, áli «altyn adamdardyń» sany 16-ǵa jete me, 26-ǵa jete me, belgisiz? Óıtkeni, biz – jer-dúnıeni at tuıaǵymen dúbirletken, tarıhy altyn áriptermen jazylǵan uly kóshpendilerdiń urpaǵymyz.
Esik qorymynan altyn kıimdi saq jaýyngerimen birge onyń dýylǵasy, altyn sapty qanjary men semseri, túrli ydys-aıaqtar jáne osy jazýy bar kúmis tostaǵan tabylǵan bolatyn. Tostaǵan «Nazarbaev Ortalyǵynda» saqtaýly tur. Jasy b.z.d IV-V ǵ.ǵ dep esepteledi. Tostaǵannyń syrtynda eki jolǵa jazylǵan 26 tańba ornalasqan. Belgili túrkitanýshy-ǵalym Altaı Amanjolov ony «Aǵa, sańa ochkýq! Bez chók! Býkýn ichre (r?) azýq i» dep oqyǵan. Maǵynasy: «Aǵa saǵan bul oshaq! Bóten el adamy tizeńdi búk! Halyqta azyq-túlik mol bolǵaı!». Tostaǵandaǵy jazý týraly ǵalymdar arasynda ártúrli pikirler bar. Zertteýshiler bul tostaǵannyń aýdarmasy týraly naqty bir sheshimge áli kelgen joq. Bul másele bolashaqta óz sheshimin tabady dep senemiz.
